သျှမ်းပြည်အရှေ့ပိုင်း၊ တာချီလိတ်မြို့နယ်၊ မိုင်းဟဲ(အောက်) ကျေးရွာအုပ်စု၊ ကော့ရားကျေးရွာအနီးမှာ ခန့်မှန်းငွေကျပ် ၂၀ ဒသမ ၂ ဘီလီယံတန်ဖိုးရှိ မူးယစ်ဆေးဝါးများနဲ့ မူးယစ်ဆေးဝါးချက်လုပ်ရာမှာ အသုံးပြုတဲ့ ဆက်စပ်ပစ္စည်းများ ပိုင်ရှင်မဲ့ သိမ်းဆည်းရမိခဲ့တယ်လို့ စစ်ကော်မရှင်ရဲ့ ဒီနေ့ထုတ် သတင်းစာမှာ ဖော်ပြထားပါတယ်။
လုံခြုံရေးတပ်ဖွဲ့ဝင်တွေ ပါဝင်တဲ့ ပူးပေါင်းအဖွဲ့တွေဟာ မတ်လ ၂၄ ရက် ညနေ ၃ နာရီခန့်အချိန်မှာ တာချီလိတ်မြို့ရဲ့ အနောက်မြောက်ဘက် မိုင်းဟဲ (အောက်)အုပ်စု၊ ကော့ရားကျေးရွာနဲ့ မီတာ ၂၀၀၀ ခန့်အကွာမှာ မသင်္ကာဖွယ်တဲတွေ တွေ့ရှိတာကြောင့် ဝင်ရောက်စစ်ဆေးရာ မူးယစ်ဆေးဝါး ချက်လုပ်/ ထုပ်ပိုးတဲ့ မိုးကာတဲကြီး ၂ လုံး၊ ထမင်းစားဆောင်တဲနဲ့ လူနေမိုးကာတဲအပါအဝင် မိုးကာတဲ ၁၀ လုံး တွေ့ရှိခဲ့တယ်လို့ သိရပါတယ်။
အဲ့ဒီမိုးကာတဲထဲမှာ WY စိတ်ကြွဆေးပြား ၆၉ သိန်း ပြား၊ စိတ်ကြွဆေးပြားအကြေ ၂၀ ကီလိုဂရမ်စီပါ ခြောက်အိတ်၊ပန်းရောင်စိတ်ကြွဆေးမှုန့် ၂၀ ကီလိုဂရမ်စီပါ ၁၅ အိတ်၊ အိုက်စ် ၁ ကီလိုဂရမ်စီပါ ၄၉ ထုပ်၊ ကဖင်း ၁၅ ကီလိုဂရမ်စီပါ ၄၆ အိတ်၊ ကဖင်း ၂၀ ကီလိုဂရမ်စီပါ အိတ် ၇၀ တွေ့ရှိသိမ်းဆည်း ရမိ ခဲ့တယ်လို့ ဖော်ပြထားပါတယ်။
ဒါ့အပြင် မူးယစ်ဆေးဝါးချက်လုပ်ရာမှာ အသုံးပြုတဲ့ ဆက်စပ်ပစ္စည်းတွေဖြစ်တဲ့ အခြောက်ခံစတီးဗန်း ၁၆ ဗန်း၊ မူးယစ်ဆေးဝါးမွှေစက် ၁ လုံး၊ ဂတ်စ်အိုး ၃၂ လုံး၊ မီးစက်အကြီး ၁ လုံး၊ မျောက်ခေါင်း တံဆိပ်အနံ့ဆေးရည် အလုံး ၂၀ စီပါ ၁၂ ဖာ၊ Promethazine တံဆိပ်ပါ ချောင်းဆိုးပျောက်ဆေး အလုံး ၂၅၀၊ ဗင်နီလင်း ၄၀ ကီလိုဂရမ်စီပါ ၄ အိတ်နဲ့ ဆက်စပ်ပစ္စည်းအများအပြား အပြင် Starlink Gen 3 တစ် လုံး တို့လည်း တွေ့ရှိသိမ်းဆည်းရမိခဲ့တယ်လို့ ဆိုပါတယ်။
အခုသိမ်းဆည်းရမိတဲ့ မူးယစ်ဆေးဝါးတွေနဲ့ ဆက်စပ်ပစ္စည်းတွေကို သက်ဆိုင် ရာသို့ လွှဲပြောင်းအပ်နှံပြီး စနစ်တကျ မီးရှို့ဖောက်ခွဲဖျက်ဆီးတာတွေ ဆက် လက်ဆောင်ရွက်သွားမှာ ဖြစ်သလို အဲဒီဒေသတဝိုက်မှာ မူးယစ်ဆေးဝါးချက်လုပ်တဲ့နေရာ ရှိနိုင်သေးတာကြောင့် နယ်မြေဖော်ထုတ်ရှင်းလင်းတာတွေ ဆက်လက် ဆောင်ရွက်သွားမယ်လို့ စစ်ကော်မရှင်က ထုတ်ပြန်ထားပါတယ်။