မန္တလေးနန်းတွင်းအခြေစိုက် အလယ်ပိုင်းတိုင်းစစ်ဌာနချုပ် (လပခ)တွင် ပလောင်(တအာင်း) အမျိုးသားလွတ်မြောက်ရေးတပ်မတော် (TNLA)၊ အာရက္ခတပ်တော် (AA)နှင့် ပြည်သူ့ကာကွယ်ရေးတပ်မတော် (PDF) တို့မှ အလင်းဝင်လာသူ ၅၀၀ ကျော်ကို ကြိုဆိုပွဲနှင့် မိဘအုပ်ထိန်းသူများထံ ပြန်လည်အပ်နှံပွဲ ကို ယနေ့ မတ် ၁၉ ရက်နံနက်ပိုင်းကပြုလုပ်ခဲ့ကြောင်း စစ်တပ်ဝါဒဖြန့် မီဒီယာများက ဖော်ပြထားသည်။
အမျိုးသား (၄၅၃) ဦး၊ အမျိုးသမီး (၅၃) ဦး (စုစုပေါင်း ၅၀၆ ဦး) တို့သည် သည်သေနတ် (၇၈) လက်အပါ အဝင် လက်နက်ခဲယမ်းများစွာနှင့်အတူ အလင်းဝင်လာခဲ့ကြခြင်း ဖြစ်ပြီး စစ်ကော်မရှင်ဘက် မှ တာဝန်ရှိသူ များက လက်ခံကြိုဆိုခဲကြောင်း၊ ၎င်းတို့အား ခံဝန်လက်မှတ် ထိုးစေပြီး ထောက်ပံ့ငွေများလည်း ပေးအပ်ခဲ့ကြောင်း သိရသည်။
၎င်းတို့သည် သပိတ်ကျင်း၊ မိုးကုတ်နှင့် တကောင်းတိုက်ပွဲအတွင်းမှ အလင်းဝင်ခဲ့ကြသူများဖြစ်ကြောင်းသိရသည်။
စိုးမိုးနယ်မြေအချို့မှ ခေတ္တဆုတ်ခွာပေးခဲ့ရသည့် ဖြစ်စဉ်တွင်အခက်အခဲများကြားတွင် ကြံ့ကြံ့မခံနိုင်သည့် မိသားစုဝင်အချို့နှင့် ရဲဘော်အချို့ကို အလယ်ပိုင်းတိုင်းစစ်ဌာနချုပ် (နန်းတွင်း) မှ နည်းမျိုးစုံဖြင့် သွေးဆောင်ဖြားယောင်းမှုများ ပြုလုပ်ခဲ့ပါသည်။
မန္တလေးမြို့ပေါ်တွင် “ ဘာမှမလုပ်ပါဘူး၊ တံခါးဖွင့်ပေးထားပါတယ်၊ ပြန်လာခဲ့ပါ” ဟုဆိုကာ မြို့နယ်/ရပ်ကွက်အလိုက် ညွှန်ကြားချက်များထုတ်၍ သတင်းလွှင့် ပြန်ခေါ်ခဲ့ကြောင်း ၊ နန်းတွင်းထဲမှ စစ်ကောင်စီသည် အညံ့ခံရောက်ရှိလာသူများကို “ ကျန်ခဲ့သည့် ရဲဘော်များကို လက်နက်ချဖို့ စည်းရုံးပါ၊ တစ်ယောက်ရရင် သက်သာခွင့်ပေးမယ်” ဟုဆိုကာ ကင်းလွှတ်ခွင့်အမျိုးမျိုးဖြင့် ထပ်မံသွေးဆောင် ခိုင်းစေမှုများရှိနေကြောင်း ပြည်သူ့ကာကွယ်ရေးတပ်မတော်TRIဗျူဟာက မတ်လ ၁၃ ရက်တွင် မန္တလေးတိုင်း (မြောက်ပိုင်း) PDF ရဲဘော်များသို့ အသိပေးချက်နှင့် တိုက်တွန်းချက် အဖြစ်ထုတ်ပြန်ထားသည်။
ထို့အပြင် ရန်သူသာမက၊ သစ္စာဖောက်များနှင့် စစ်ကောင်စီ၏ အလိုတူအလိုပါ “ နှစ်ဖက်ချွန်” များကိုပါ တော်လှန်ရေးပြီးဆုံးသည်အထိ ခွင့်လွှတ်မည် မဟုတ်ကြောင်း TRIဗျူဟာအသိပေးထားသည်။