ဒီကနေ့ မတ်လ ၁၄ ရက် နံနက် ၉ နာရီခွဲအချိန်မှာ ပုံမှန်ကင်းလှည့်နေတဲ့ ကိုးကန့်တပ် MNDAA တပ်ဖွဲ့ဝင်တွေကို တအာင်းတပ် TNLA က ကြားဖြတ်တိုက်ခိုက်ခဲ့တာကြောင့် မတတ်နိုင်လို့ တန်ပြန်ခုခံ တိုက်ခိုက်ခဲ့ရပြီး ယခုဖြစ်စဥ်ကြောင့် ပေါ်ပေါက်လာတဲ့ နောက်ဆက်တွဲ ပြဿနာအားလုံးကို တအာင်း အဖွဲ့အစည်း PSLF/TNLA က အပြည့်အဝ တာဝန်ယူရမယ်လို့ MNDAA က ဒီကနေ့ မွန်းလွဲပိုင်းမှာ ထုတ်ပြန်လာပါတယ်။
MNDAA အနေနဲ့ ညီနောင်မဟာမိတ်ချစ်ကြည်ရေးအား အလွန်အလေးထားပြီး အခြားလက်နက်ကိုင် အဖွဲ့အစည်းတွေနဲ့ စစ်ရေးပွတ်တိုက်မှု ဖြစ်ပွားတာကို လုံးဝမလိုလားဘူးလို့ ဖော်ပြထားပါတယ်။
သို့ပေမဲ့ အကြမ်းဖက်တိုက်ခိုက်ခံရတာ၊ ဂုဏ်သိက္ခာတွေ ချနင်းခံရတာ၊ လူမှုဘဝရှင်သန်ရေးကို ခြိမ်းခြောက်ခံတာ စတဲ့ လုပ်ဆောင်ချက်တွေ ဖြစ်ပေါ်လာပါက ၎င်းတို့အနေနဲ့ အစွမ်းကုန်ခုခံကာကွယ် သွားမယ်လို့ MNDAA က ထုတ်ပြန်ကြေညာထားပါတယ်။
ပြီးခဲ့တဲ့ ဖေဖော်ဝါရီလ ၁၃ ရက်က ကိုးကန့်တပ်ရဲ့ ကွတ်ခိုင်အုပ်ချုပ်ရေးဌာနကို တအာင်းတပ် က အကြမ်းဖက်ဝင်ရောက် တိုက်ခိုက်စီးနင်းကာ သေနတ်ဖောက်ပြီး ခြိမ်းခြောက်တာ တပ်ဖွဲ့ဝင်တွေကို ရိုက်နက်တာကြောင့် ကိုးကန့်တပ်ဖွဲ့ဝင် အများအပြား ပြင်းထန်ဒဏ်ရာရရှိခဲ့တယ်လို့ ဖော်ပြထား ပါတယ်။
အဲ့ဒီအခင်းဖြစ်ပွားပြီး တအာင်းအဖွဲ့အစည်းထံ ၅ ကြိမ်တိုင် အကြောင်းကြားစာ ပေးပို့ခဲ့ပြီး တွေ့ဆုံဆွေးနွေးဖို့ တောင်းဆိုခဲ့သော်လည်း TNLA ဘက်မှ မျက်ကွယ်ပြုထားတယ်လို့ ဆိုပါတယ်။
ဖေဖော်ဝါရီ ၁၇ ရက်နေ့ကလည်း TNLA မှ သိန္နီခရိုင်အတွင်းသို့ တပ်ဖွဲ့များ စေလွတ်ပြီး MNDAA ထိန်းချုပ်နယ်မြေအား လုယူသိမ်းပိုက်ရန် ရည်ရွယ်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
အဲ့လိုလုပ်ဆောင်ချက်တွေကြောင့် ခဲခဲရင်းရင်း အစွမ်းကုန်ကြိုးပမ်းဖော်ဆောင်ခဲ့တဲ့ နိုင်ငံရေး အခြေအနေတွေ ပျက်စီးပြိုလဲသွားရတဲ့အပြင် နှစ်ဦးနှစ်ဖက်ရဲ့ ညီနောင်မဟာမိတ်ဆက်ဆံရေးကိုလည်း လွန်စွာထိခိုက်စေခဲ့တယ်လို့ ထုတ်ပြန်ထားပါတယ်။