စက်သုံးဆီများ မပြတ်လပ်စေဖို့၊ အမှန်တကယ်လိုအပ်သူများ ဝယ်ယူနိုင်စေဖို့နဲ့ တစ်ရက်အတွင်း ၂−၃ ကြိမ် တန်းစီဝယ်ယူတာတွေ လျော့နည်းပပျောက်စေဖို့ဆိုပြီး စက်သုံးဆီ အရောင်းဆိုင်တွေမှာ Application စနစ်နဲ့ စစ်ဆေးပြီး ရောင်းချပေးတဲ့ စနစ်ကို ဒီကနေ့ မတ်လ ၁၂ ရက်မှာ စတင်အသုံးပြု သွားမယ်လို့ စွမ်းအင်ဝန်ကြီးဌာနက ယမန်နေ့ညပိုင်း ထုတ်ပြန်ထားပါတယ်။
ကား (မော်တော်ယာဉ်)တွေအတွက် Wheel Tax ပေါ်ရှိ Barcode ကို scan ဖတ် စစ်ဆေးမှာဖြစ်ပြီး မော်တော်ဆိုင်ကယ်တွေအတွက် QR Code ထုတ်ပေးကာ ၁ ရက်အတွင်း စက်သုံးဆီ ၁ ကြိမ်သာ ဝယ်ယူခွင့်ရှိမှာဖြစ်တယ်လို့ ဖော်ပြထားပါတယ်။
အကယ်၍ ယာဉ်တစ်စီးဟာ တစ်ရက်အတွင်း ဆီဝယ်ယူပြီးသားဖြစ်ပါက နောက်ထပ်ဝယ်ယူဖို့ ကြိုးစားရင် မည်သည့်ဆိုင်မှာမဆို scan ဖတ်ပါက အဲ့ဒီရက်မှာ ဝယ်ယူခဲ့မှုကိုစနစ်မှ ပြသပေးမည်ဖြစ်ပြီး ဆီဝယ်ယူခွင့် ရရှိမှာမဟုတ်ဘဲ နောက်တစ်ရက်မှသာ ထပ်မံဝယ်ယူနိုင်မှာဖြစ်တယ်လို့ သိရပါတယ်။
မော်တော်ဆိုင်ကယ်တွေရဲ့ Wheel Tax ပေါ်မှာ Barcode မပါရှိတဲ့အတွက် ယာဥ်ပိုင်ရှင်တွေအနေနဲ့ Wheel Tax ကို အရောင်းဆိုင်ဝန်ထမ်းထံ ပေးအပ်ပြီး ယာဉ်နံပါတ်နဲ့ သက်တမ်းကုန်ဆုံးရက်တွေကို Application မှာ ဖြည့်သွင်းကာ QR Code ထုတ်ယူရမှာဖြစ်ပါတယ်။
အဲ့ဒီ QR Code ကို ဖုန်းနဲ့ ဓာတ်ပုံရိုက်ထားတာ ဒါမှမဟုတ် Print ထုတ်ကာ သိမ်းဆည်းထားနိုင်ပြီး စက်သုံးဆီ ဝယ်ယူချိန်တိုင်း QR Code ပြသရမှာဖြစ်ကာ တစ်ရက်ကို ၁ ကြိမ်သာ ဝယ်ယူနိုင်တယ်လို့ ထုတ်ပြန်ထားပါတယ်။
ဒီစနစ်ကို ယနေ့ မတ်လ ၁၂ နေ့မှစပြီး နေပြည်တော်၊ ရန်ကုန်၊ မန္တလေး နဲ့ တောင်ကြီးမြို့တွေမှာ စမ်းသပ်အသုံးပြုသွားမှာဖြစ်ပြီး နောက်ပိုင်းမှာ အခြားမြို့တွေမှာလည်း တိုးချဲ့သွားမှာဖြစ်တယ်လို့ စွမ်းအင်ဝန်ကြီးဌာနက အသိပေးထုတ်ပြန်ထားပါတယ်။