သျှမ်းပြည်မြောက်ပိုင်း၊ လားရှိုးမြို့နယ်နဲ့ သီပေါမြို့နယ်အတွင်းမှ ကျေးရွာအုပ်ချုပ်ရေးကော်မတီဝင်နဲ့ ဒေသခံတစ်ဦး အား ကိုးကန့်တပ်မတော် (MNDAA)က အကြောင်းမဲ့ဖမ်းဆီးပြီး ရိုက်နှက်စစ်ဆေးခဲ့တယ်လို့ သျှမ်းမြောက်ဒေသတွင်း သတင်းရင်းမြစ်ထံမှ သိရပါတယ်။
ပြီးခဲ့တဲ့ ဖေဖော်ဝါရီလ ၇ ရက်နေ့ ညနေ ၄ နာရီခွဲအချိန်ခန့်မှာ လားရှိုးမြို့နယ်၊ နောင်မွန်ကျေးရွာအုပ်စု၊ ပန်ဆက်ကျေးရွာအုပ်ချုပ်ရေးကော်မတီဝင် လုံးစိုင်းမွန် အား MNDAA တပ်ဖွဲ့ဝင် ၅ ဦးက နေအိမ်မှာတင် လာရောက်ဖမ်းဆီးခဲ့တာဖြစ်ပြီး နားလင်းကျေးရွာဘက်မှာရှိတဲ့ MNDAA တပ်စခန်းသို့ ဖမ်းဆီးခေါ်ဆောင်သွားခဲ့တာလို့ သိရပါတယ်။
ဒေသခံတွေရဲ့ ပြောပြချက်အရ “ လုင်းစိုင်းမွန် က ရွာထဲမှာ အခွန်အခတွေကောက်ပြီး သျှမ်းတပ်ဖွဲ့ကို ထောက်ပံ့ပေးနေတယ်လို့ MNDAA ဘက်က စွပ်စွဲပြီး ရိုက်နှက်စစ်ဆေးခဲ့တာဖြစ်တယ်လို့” ဆိုပါတယ်။
လုံးစိုင်းမွန် အား ပြန်လွှတ်ပေးဖို့ နောင်မွန်ကျေးရွာအုပ်စုမှ ဒေသခံတွေ သွားရောက်တောင်းဆိုချိန်မှာ MNDAA ဘက်က သေနတ်ပစ်ဖောက် ခြိမ်းခြောက်ခဲ့သလို “ အခွန်ကောက်ပြီး သျှမ်းတပ်ကို ဆက်ကူညီရင် အကုန်ဖမ်းပြီး သိန္နီဘက် ပို့ပစ်မယ် ” လို့ ထပ်မံခြိမ်းခြောက်ခဲ့တယ်လို့ သိရပါတယ်။
နောက်ဆုံးမှာတော့ လုင်းစိုင်းမွန် က နောက်နောင် သျှမ်းတပ်ကို မကူညီတော့ပါဘူးလို့ ခံဝန် ကတိထိုးရပြီး အဲ့နေ့ ည ၇ နာရီခန့်အချိန်မှာ ပြန်လွှတ်ပေးခဲ့တယ်လို့ သိရပါတယ်။
အလားတူ ဖေဖော်ဝါရီလ ၈ ရက်နေ့ နံနက် ၈ နာရီဝန်းကျင်မှာလည်း သီပေါမြို့နယ်၊ နားနန်းကျေးရွာ အရှေ့ဘက်မှာ တပ်စွဲထားတဲ့ MNDAA တပ်ဖွဲ့ဝင်တွေက ရွာခံ စိုင်းကျော်လှ အား အကြောင်းမဲ့ ဖမ်းဆီးခဲ့ပြီး ကျေးရွာကော်မတီဝင် ၅ ဦးက သွားရောက်ညှိနှိုင်း အာမခံပေးရကာ အဲ့နေ့ မွန်းလွဲပိုင်းမှာ ပြန်လည်လွှတ်ပေးခဲ့တာလို့ သိရပါတယ်။
လက်ရှိ သျှမ်းမြောက်ဒေသ နယ်မြေစိုးမိုးရေးအတွက် MNDAA အနေနဲ့ ဒေသခံအုပ်ချုပ်ရေးအဖွဲ့ဝင်တွေကို ဖိအားပေးတာ၊ ဖမ်းဆီးနှိပ်စက်တာတွေ လုပ်ဆောင်နေတာကြောင့် ဒေသခံပြည်သူတွေကြား စိုးရိမ်ထိတ်လန့်မှုတွေ မြင့်တက်နေတယ်လို့ ဒေသတွင်းသတင်းရင်းမြစ်ဆီက သိရပါတယ်။
Photo – လားရှိုးမြို့နယ်၊ ဝမ်စယ်ဒေသခံပြည်သူများအား MNDAA မှ ဖမ်းဆီးသွားစဥ် (ပုံဟောင်း)