ဖေဖေါ်ဝါရီလ ၇ ရက်နေ့က သျှမ်းပြည်ပြန်လည်ထူ ထောင်ရေးကောင်စီ/သျှမ်းပြည်တပ်မတော် (RCSS/SSA)ဌာနချုပ် လွိုင်တိုင်းလျဲန်းမှာ ကျင်းပတဲ့ (၇၉) နှစ်မြောက် သျှမ်းပြည်အမျိုးသားနေ့ အခမ်းအနားမှာ SSA တပ်ဖွဲ့ဝင်တွေနဲ့အတူ ချီတက်လာတဲ့ ရိုင်ဖယ်တပ် စက်ရုပ်ခွေး တစ်ကောင်ကို လူအများက စိတ်ဝင်စားနေကြပါတယ်။
အဲ့ဒီ စစ်ရေးစက်ရုပ်ခွေးဟာ တရုတ်နိုင်ငံ Unitree ကုမ္ပဏီက ထုတ်လုပ်တာဖြစ်ပြီး ခြေလေးချောင်း ထောက်နဲ့ လှုပ်ရှားနိုင်တဲ့ Unitree Go2 / Go2 Pro ဖြစ်ကာ ရိုင်ဖယ်သေနတ်မပါဘဲ စက်ရုပ်အလွတ် ပေါက်စျေးကို ဒေါ်လာ ၁,၆၀၀ ကနေ ၁၃,၀၀၀ ကြားရှိတယ်လို့ သိရပါတယ်။
စက်ရုပ်ခွေးရဲ့ အရှေ့ဖက်မှာ ကင်မရာ sensor ပါဝင်ကာ နေ့ဘက်ရော ညဘက်ပါ ပတ်ဝန်းကျင်ကို စောင့်ကြည့်နိုင်ပြီး ခြေထောက်တွေက မညီမညာတဲ့ မြေပြင်ပေါ်မှာပါ လှုပ်ရှားနိုင်အောင် ဒီဇိုင်းထုတ်ထားတာ ဖြစ်ပါတယ်။
ဒီစစ်ရေး စက်ရုပ်ခွေးကို အန္တရာယ်ရှိတဲ့နေရာတွေမှာ လူအစားထိုး စောင့်ကြည့်နိုင်ဖို့၊ ကင်းလှည့် ထောက်လှမ်း ရေး လုပ်ဆောင်ဖို့နဲ့ နောက်ပိုင်းမှာ တပ်သားတွေကို အန္တရာယ်ဇုန်ကနေ လျှော့ချပေးဖို့ စတဲ့ ရည်ရွယ်ချက်တွေနဲ့ ဖန်တီးထားတာဖြစ်တယ်လို့ သိရပါတယ်။
ဒီစက်ရုပ်ခွေးမှာ AI စနစ်ပါဝင်ပြီး လူကပဲ remote နဲ့ ထိန်းချုပ်ရတာဖြစ်ကာ GPS စနစ်လည်း ပါဝင်တာကြောင့် တိကျတဲ့နေရာတွေ သိနိုင်မှာပဲပါတယ်။
စက်ရုပ်ပေါ်မှာ တပ်ထားတဲ့ ရိုင်ဖယ်သေနတ်ကိုတော့ Stabilized mount နဲ့ တပ်ဆင်ထားတာဖြစ်ပြီး လှုပ်ရှားနေရင်တောင်မှာ တုန်ခါမှုကို လျော့ကျအောင် ဒီဇိုင်းထုတ်ထားတာဖြစ်ကာ ပစ်ခတ်မှုကိုတော့ လူကပဲ အဝေးကနေ ထိန်းချုပ်တာဖြစ်ပါတယ်။