သျှမ်းပြည်မြောက်ပိုင်း၊ လားရှိုးမြို့နယ်၊ နမ့်ပေါင်ကျေးရွာအုပ်စု၊ ဝမ်စယ်ကျေးရွာမှ ဒေသခံပြည်သူ ၉ ဦးကို ကိုးကန့်တပ် MNDAA က မတရားဖမ်းဆီး ရိုက်နက်နှိပ်စက်ခဲ့ပြီး ယနေ့ချိန်ထိ ပြန်မလွှတ်ပေး သေးဘူးလို့ သိရပါတယ်။
ဖြစ်စဥ်မှာ ပြီးခဲ့တဲ့ ဇန်နဝါရီလ ၁ ရက်က ဝမ်စယ်ကျေးရွာရှိ ဒေသခံပြည်သူများပိုင်ဆိုင်တဲ့ လယ်ယာမြေတွေပေါ် မှာ ပိုင်ရှင်ကို အသိမပေးဘဲ ကိုးကန့်တပ် MNDAA က တရုတ်လုပ်ငန်းရှင်တွေ ခေါ်လာကာ ရွှေတူးဖော်ဖို့ စီစဥ်နေတာကို ဒေသခံတွေ ဝိုင်းကန့်ကွက်တဲ့အတွက် ဆန္ဒပြသူကို ဖမ်းဆီး ခေါ်ဆောင်သွားတာလို့ သိရပါတယ်။
“ ဝမ်စယ်ဒေသခံရဲ့ လယ်မြေပေါ်မှာ MNDAA က ရွှေတူးဖို့ မြေရှင်တွေကို ခွင့်လည်းမတောင်းဘူး၊ ပြီးတော့ ဝမ်စယ်ချောင်းပေါ်မှာ သွားလာရေးအဆင်ပြေဖို့ ဒေသခံတွေက တံတားထိုးဖို့ပြင်တယ်ပေါ့၊ အဲ့ဒါကို သူတို့ ရွှေလာတူးမယ့် ဖောင်တွေ လာလို့မရမှာစိုးလို့ တံတားလည်းပေးမထိုးဘူး၊ အဲ့ဒါကို ဒေသခံ ရာနဲ့ချီသွားပြီး MNDAA ကို ဆန္ဒပြတာ၊ ဆန္ဒပြသူထဲက ရွာသား ၃၆ ဦး ဖမ်းသွားတယ်၊ ၂၇ ဦးကို ပြန်လွှတ်ပေးပြီး ၉ ဦးကိုတော့ ဆက်လက်ဖမ်းဆီးထားတယ်” လို့ ဖြစ်စဥ်သိရှိသူ လားရှိုးဒေသခံ တစ်ဦးက ပြောပါတယ်။
လက်ရှိ MNDAA ဖမ်းဆီးထားတဲ့ ဒေသခံ ၉ ဦးမှာ စိုင်းလူ၊ စိုင်းစံမြ၊ စိုင်းပန်းစိန်၊ စိုင်းဆမ်၊ စိုင်းထွန်းကျော်၊ စိုင်းပွန့်၊ စိုင်းသန်းနဲ့ စိုင်းမောင် တို့ဖြစ်ကြပြီး အဲ့ဒီထဲက ၃ ဦးဟာ MNDAA တပ်ဖွဲ့က ရိုက်နှက်နှိပ်စက်ထားတဲ့အတွက် အသက်အန္တရာယ် စိုးရိမ်နေရတဲ့ အခြေအနေမှာ ရှိနေတယ်လို့ သိရပါတယ်။
MNDAA မှ ဖမ်းဆီးသွားတဲ့ ဒေသခံ ၉ ဦးကို ယနေ့ ဇန်နဝါရီလ ၄ ရက် နံနက်ပိုင်းအချိန်ထိ ပြန်လည်လွတ်မြောက်လာတာ မရှိသေးဘူးလို့ သိရပါတယ်။
ဒေသခံပြည်သူတွေရဲ့ လယ်ယာမြေတွေကို အဓမ္မသိမ်းယူပြီး ရွှေတူးရန်လုပ်ဆောင်တာ၊ အပြစ်မဲ့ ပြည်သူများ ဖမ်းဆီးတာတွေကို ပြင်းထန်စွာကန့်ကွက်ပြီး မတရားဖမ်းဆီးခံ ရွာသားများကို အမြန်ဆုံး ပြန်လွတ်ပေးရန်နဲ့ ရွာသားများရဲ့ အသက်အန္တရာယ်ကို အာမခံပေးရန် ကိုးကန့်တပ်ဖွဲ့ MNDAA အား သျှမ်းကျောင်းသားသမဂ္ဂ (Tai Students’ Union) မှ တောင်းဆိုထားကြောင်း သိရပါတယ်။