စစ်တပ်အာဏာသိမ်းတဲ့ ၂၀၂၁ ခုနှစ်၊ ဖေဖော်ဝါရီလမှစတင်ပြီး အကြောင်းအမျိုးမျိုးကြောင့် ခွင့်ပြုချက် မရရှိဘဲ လုပ်ငန်းခွင်ကို စွန့်ခွာသွားကြတဲ့ နိုင်ငံ့ဝန်ထမ်းတွေကို အမည်မည်းစာရင်း (Black Lists)မှ ဖြေလျှောပေးတယ်လို့ အမျိုးသားကာကွယ်ရေးနှင့်လုံခြုံရေးကောင်စီက ယနေ့ ဇန်နဝါရီ ၃၁ ရက် ညပိုင်းမှာ ထုတ်ပြန် လာပါတယ်။
နိုင်ငံ့ဝန်ထမ်း အချို့ဟာ ခွင့်ပြုချက် မရရှိဘဲ လုပ်ငန်းခွင်ကို စွန့်ခွာသွားတဲ့အတွက် အမည်မည်းစာရင်း (Black Lists)မှာ ပါဝင်နေပြီး စိုးရိမ်ပူပန်စိတ်နဲ့ အခြားနေရာများသို့ ရှောင်တိမ်းနေကြရတယ်လို့ ဆိုပါတယ်။
လုပ်ငန်းခွင်ကို စွန့်ခွာသွားတဲ့ ဝန်ထမ်းများအနေနဲ့ မိမိတို့ ရောက်ရှိနေတဲ့ နေရာတွင်ရှိတဲ့ ယခင်တာဝန် ထမ်းဆောင်ခဲ့တဲ့ ဌာနရဲ့ ရုံးများသို့လည်းကောင်း၊ နီးစပ်ရာမြို့နယ်ခွဲ၊ မြို့နယ်၊ ခရိုင်၊ တိုင်းဒေသကြီးနဲ့ ပြည်နယ်အုပ်ချုပ်ရေးအဖွဲ့ အစည်းများသို့လည်းကောင်း၊ မြန်မာနိုင်ငံသံရုံး၊ စစ်သံရုံးနဲ့ ကောင်စစ်ဝန်ချုပ်ရုံးများသို့လည်းကောင်း ပြန်လည် သတင်းပို့ပြီး အမည်မည်းစာရင်း(Black Lists)မှ ဖြေလျှော့ခွင့်တောင်းဆိုနိုင်တယ်လို့ ဖော်ပြထားပါတယ်။
အဲ့ဒီလို ဆက်သွယ်လာသူတွေကို စိစစ်ပြီး ပြစ်မှုကျူးလွန်ခဲ့ခြင်း မရှိတဲ့ ဝန်ထမ်းများနဲ့ ပြစ်မှုကျူးလွန်ပြီး ပြစ်ဒဏ်ကျခံပြီးသော်လည်း Black Lists ထဲဝင်နေသူတွေကို အမည်မည်းစာရင်း(Black Lists)မှ ဖြေလျှော့ပေး လျက်ရှိတယ်လို့ ကာ/လုံရဲ့ သတင်းထုတ်ပြန်ရေးအဖွဲ့က ထုတ်ပြန်ခဲ့ပါတယ်။
စစ်တပ်အာဏာသိမ်းတဲ့ ၂၀၂၁ ခုနှစ် ဖေဖော်ဝါရီလ ၁ ရက်ကစပြီး ၅ နှစ်တာကာလ ပြည့်တဲ့အချိန်မှာ စစ်အုပ်စုက အခုလို ပထမဆုံး ဖြေလျော့ပေးလာတာပဲဖြစ်ပါတယ်။