ရွေးကောက်ပွဲမှာ အနိုင်ရရှိပြီး ထိုင်းဝန်ကြီးချုပ်ဖြစ်လာပါက ထိုင်းနိုင်ငံက အပျို/လူပျို တစ်ကိုယ်ရေ သမားများအတွက် အိမ်ထောင်ဖက် ရှာဖွေပေးမယ့်မူဝါဒ ချမှတ်ပြီး ဖော်ဆောင်ပေးမယ်လို့ New Alternative Party က ကိုယ်စားလှယ်လောင်း Mongkolkit Suksintharanon က ယမန်နေ့က သူ့ရဲ့ Facebook စာမျက်နှာ ကနေတဆင့် မဲဆွယ်စည်းရုံးခဲ့ပါတယ်။
သူမဲဆွယ်စည်းရုံးတဲ့ထဲမှာ အစိုးရဟာ အိမ်ထောင်ဖက် မရှိတဲ့ နိုင်ငံသားများအတွက် သင့်တော်တဲ့ အိမ်ထောင် ဖက် (လိင်တူ၊ လိင်ကွဲ)များကို ရှာဖွေပေးမှာဖြစ်ပြီး အတူ တကွနေထိုင်ပြီးနောက် အဆင်မပြေရင် အိမ်ထောင်ဖက်အသစ်တစ်ဦးကို စီစဥ်ပေးမယ်လို့ ဆိုပါတယ်။
ဒါ့အပြင် ထိုင်းနိုင်ငံသားတစ်ဦးက နိုင်ငံခြားသား အိမ်ထောင်ဖက်တစ်ဦးကို လိုချင်ပါကလည်း အစိုးရက ဆောင်ရွက်ပေးမယ်လို့ ပြောဆိုထားပါတယ်။
သူ့ရဲ့ မဲဆွယ်စည်းရုံးမှုကို ထိုင်းနိုင်ငံက တစ်ကိုယ်ရေသမားများအတွက် နှစ်သက်သဘောကျပြီး မြင်ဖူးသမျှ မူဝါဒတွေထဲမှာ ဒီတစ်ခုက အကောင်းဆုံးဖြစ်တယ်လို့ သူ့ရဲ့ ပိုစ့်အောက်ကနေ မှတ်ချက်ပေးပြီး အရွှန်းဖောက်ပြောနေကြပါတယ်။
ပြီးခဲ့တဲ့ ရက်ပိုင်းက မဲဆွယ်စည်းရုံးရေးတစ်ခုမှာလည်း အမျိုးသမီးတစ်ဦးလျှင် လင်ယောကျာ်း ၄ ဦး ယူနိုင်တဲ့ ဥပဒေပြဋ္ဌာန်းပေးမယ်လို့လည်း အဲ့ဒီပါတီက ကိုယ်စား လှယ်လောင်းက မဲဆွယ်စည်းရုံး ပြောဆိုခဲ့တာကြောင့် ဆိုရှယ်မီဒီယာ အသုံးပြုသူတွေကြား လူပြောများခဲ့ပါတယ်။
လာမယ့် ဖေဖော်ဝါရီလ ၈ ရက်မှာ ထိုင်းရွေးကောက်ပွဲ ကျင်းပသွားမယ်လို့ ထိုင်းရွေးကောက်ပွဲ ကော်မရှင်က ကြေညာထားပြီး ပါတီနိုင်ငံရေးတွေကလည်း ပုံစံအမျိုးမျိုးနဲ့ မဲဆွယ်စည်းရုံး နေကြပါတယ်။