တောင်ကြီးမြို့ ဗိုလ်ချုပ်ပန်းခြံကို စည်ကားသာယာလှပစေရေး ခေါင်းစဥ်တပ်ကာ မြို့နယ် စည်ပင်သာ ယာရေးနှင့် ရှမ်းချယ်ရီတောင်တန်း ဆောက်လုပ်ရေးကုမ္ပဏီတို့ အကျိုးတူပူးပေါင်း၍လူနေဆိုင်ခန်းများ ဆောက်လုပ်ရန် စီစဥ်နေမှု မြို့ခံ များလက်မခံ သဖြင့် စီမံကိန်း ပျက်ပြယ်ကြောင်းသိရသည်။
“ မြို့ခံတွေကလည်းကန့်ကွက်တယ်ဒါ့ကြောင့် မြို့ နယ်စည်ပင်ကပဲ ပြန်ပြီး မဆောက်လုပ်သင့်ကြောင်းဘာညာ မှတ် ချက်ပြုတဲ့အတွက် ပြည်နယ်အစိုးရက ခွင့်ပြုချက်မပေးဘူး အဲ့ဒီလိုနဲ့ ပျက်သွားတာ ” ဟု တောင်ကြီး မြို့နယ်ထွေအုပ်ရုံးက သတင်းရင်းမြစ်တစ်ဦးကပြောသည်။
တောင်ကြီးမြို့နယ် စည်ပင်သာယာရေး ဌာနပိုင် ၊ တောင်ကြီးမြို့ ၊ ဗိုလ်ချုပ်အောင်ဆန်း ပန်းခြံအား စည်ကား သာယာ လှပစေရန် အတွက် မြို့နယ် စည်ပင်သာယာရေး ဌာန နှင့် အကျိုးတူ ပူးပေါင်းဆောင်ရွက်၍ (၁၈ ပေ × ၄၀ ပေ) (၃) ထပ် လူနေဆိုင်ခန်း တွဲများ တည်ဆောက်ခွင့်ပြုနိုင်ပါရန် ရှမ်းချယ်ရီ တောင်တန်း ဆောက်လုပ်ရေး ကုမ္ပဏီမှ တင်ပြခဲ့ခြင်း ဖြစ်ကြောင်း သိရသည်။ ထိုစီမံကိန်းကို ၂၀၂၅ ခုနှစ် ဇန်နဝါရီလ ၈ ရက်တွင် အစိုးရ အဖွဲ့ မှ ပယ်ချလိုက်ခြင်း ဖြစ်ကြောင်းသိရသည်။
အဆိုပါ ပန်းခြံသည် တောင်ကြီးမြို့၏ အထင်ကရ နေရာဖြစ်သည့်အပြင် ကလေးများ ဆော့ကစားရာ၊ ပြည်သူများ အပန်း ဖြေရာ နေရာတစ်ခုလည်း ဖြစ်သလို ၈လေးလုံး အရေးအခင်းလှုပ်ရှားမှု သမိုင်းမှတ်တိုင်အဖြစ် ကျောက် တိုင်စိုက်ထူထားစည့်နေရာဖြစ်သည့်အတွက် မြို့ခံလူထုများက ၄င်းစီမံကိန်းကို ဝေဖန်ကန့်ကွက်မှုများစွာရှိနေကြောင်း သိရသည်။