ကိုးကန့်ဒေသတစ်ခုလုံး ပြန်လည်သိမ်းပိုက်နိုင်ဖို့ လက်ကျန်တပ်စခန်းတစ်ခုဖြစ်တဲ့ နန်ထင်မိန်တောင် စခန်းကုန်းကို ပြီးခဲ့တဲ့ ၂၀၂၄ ခုနှစ်၊ ဇန်နဝါရီလ ၅ ရက်နေ့က အောင်မြင်စွာ သိမ်းပိုက်နိုင်ခဲ့တာကြောင့် အဲ့ဒီနေ့ကို အမှတ်ရစေဖို့ဆိုပြီး ပြန်လည်ထူထောင်ရေးနေ့အဖြစ် အထူးဒေသအုပ်ချုပ်ရေး ကော်မတီက တရားဝင် သတ်မှတ်ခဲ့တယ်လို့ MNDAA က ယနေ့မှာ ထုတ်ပြန်ထားပါတယ်။
အဲ့ဒီတိုက်ပွဲအတွင်းမှာ လောက်ကိုင်မြို့၊ ဒေသကွပ်ကဲရေးစစ်ဌာနချုပ်(ဒစက) ဗိုလ်မှူးချုပ် ၆ ဦး၊ အရာရှိ ၂၂၈ ဦး အပါအဝင် ရဲဘော်နဲ့အခြားအဆင့် ၂၀၀၀ ခန့်က ကိုးကန့်တပ်ထံ လက်နက်ချ အညံ့ခံခဲ့တာ ဖြစ်ပြီး သျှမ်းမြောက် အထူးဒေသ−၁ ဖြစ်တဲ့ ကိုးကန့်ဒေသအားလုံးကို ၁၄ နှစ်အကြာမှာ ပြန်လည်သိမ်းယူ နိုင်ခဲ့တဲ့နေ့လည်းဖြစ်ပါတယ်။
ဒီမိုကရေစီတော်လှန်ရေးခရီးလမ်းမှာ အသက်ပေးခဲ့ကြတဲ့ အာဇာနည်တွေကို ဂုဏ်ပြုဖို့၊ ရန်သူကို မကြောက်ရွံ့ဖို့နဲ့ ပိုကောင်းတဲ့အနာဂတ်အတွက် ရဲဝင့်စွာထမ်းဆောင်သွားဖို့ဆိုပြီး ရည်ရွယ်ကာ အထူးဒေသ−၁ ရှိ ဒေသအနှံ့မှာ ပြန်လည်ထူထောင်ရေးနေ့ အထိမ်းအမှတ်ပွဲတွေ ကျင်းပတယ်လို့ ဆိုပါတယ်။
လက်ရှိအချိန်မှာ အထူးဒေသနယ်မြေအတွင်း စစ်ကောင်စီတပ်ဖွဲ့ဝင် တစ်ဦး တစ်ယောက်မျှမရှိတော့ဘဲ ကိုးကန့်ဒေသနဲ့ မုံးကိုးခရိုင်ရဲ့ သမိုင်းဝင်နယ်မြေတွေကို အပြည့်အဝ ပြန်လည်ထိန်းချုပ်နိုင်ခဲ့သလို သိန္နီနဲ့ ကွတ်ခိုင်ဒေသတွေပါ ဆက်တိုက်လွတ်မြောက်လာခဲ့ပြီး အထူးဒေသ−၁ ကို မြို့တော် ၁ ခု၊ ခရိုင် ၄ ခု ပါဝင်တဲ့ ဖွဲ့စည်းပုံနဲ့ ဖွံ့ဖြိုးတိုးတက်ရေး ကဏ္ဍသစ်သို့ ခြေလှမ်းစတင်နိုင်ခဲ့တယ်လို့ The Kokang က ရေးသားဖော်ပြထားပါတယ်။
