ယမန်နေ့က ကျင်းပပြီးစီးသွားတဲ့ စစ်ကော်မရှင်ရဲ့ ရွေးကောက်ပွဲ အပိုင်း(၁)မှာ အာဆီယံအဖွဲ့ဝင် နိုင်ငံများထဲမှ ဗီယက်နမ်နိုင်ငံနဲ့ ကမ္ဘောဒီးယားနိုင်ငံတို့ကသာ ရွေးကောက်ပွဲ လေ့လာသူအဖြစ် စေလွတ်ခဲ့တယ်လို့ စစ်ကော်မရှင်ရဲ့ နေ့စဥ်ထုတ်သတင်းစာအရ သိရပါတယ်။
ဗီယက်နမ်ကိုယ်စားလှယ်အဖွဲ့ကို နိုင်ငံတကာဆက်ဆံရေး အကြီးအကဲ Mr.Nguyen Duc Thinh က ဦးဆောင်ပြီး ကမ္ဘောဒီးယား ကိုယ်စားလှယ်အဖွဲ့ကို ဗဟိုရွေးကောက်ပွဲကော်မရှင်အဖွဲ့ဝင် H.E. Mr. Yich Sameth က ဦးဆောင်ခဲ့တယ်လို့ သိရပါတယ်။
ဒါ့အပြင် ရုရှား၊ တရုတ်၊ ဘယ်လာရုစ်၊ ကာဇက်စတန် စတဲ့ နိုင်ငံက ကိုယ်စားလှယ်တွေစေလွတ်ပြီး နေပြည်တော် ဇမ္ဗူသီရိ၊ ပုဗ္ဗသီရိနဲ့ ပျဥ်းမနားတို့ရှိ မဲရုံတွေမှာ သွားရောက်လေ့လာခဲ့တယ်လို့ ဆိုပါတယ်။
အလားတူ အိန္ဒိယ နဲ့ နီကာရာဂွါနိုင်ငံမှလည်း ရွေးကောက်ပွဲစောင့်ကြည့်လေ့လာသူ ကိုယ်စားလှယ်များ စေလွတ်ခဲ့တယ်လို့ သိရပါတယ်။
မြန်မာနိုင်ငံနဲ့ အိမ်နီးချင်းနိုင်ငံလည်းဖြစ် စစ်ကော်မရှင်နဲ့လည်း ဆက်ဆံရေးရှိတဲ့ ထိုင်းနိုင်ငံကတော့ ရွေးကောက်ပွဲလေ့လာစောင့်ကြည့်ရေး ကိုယ်စားလှယ်တစ်ဦးတစ်ယောက်မျှ စေလွတ်တာ မတွေ့ရ သလို စစ်ကော်မရှင်ဘက်ကလည်း ထုတ်ပြန်ထားတာမရှိပါဘူး။
အလားတူ စင်ကာပူ၊ မလေးရှား၊ အင်ဒိုနီးရှား၊ ဘရူးနိုင်း၊ ဖိလစ်ပိုင်၊ လာအိုနဲ့ အရှေ့တီမောနိုင်ငံတို့ကလည်း စစ်ကော်မရှင်ရဲ့ ရွေးကောက်ပွဲ စောင့်ကြည့်လေ့လာသူ စေလွတ်တာမရှိပါဘူး။
ယခုကျင်းပတဲ့ ရွေးကောက်ပွဲမှာ နိုင်ငံတကာရွေးကောက်ပွဲ စောင့်ကြည့်လေ့လာသူပေါင်း ၁၆၂ ဦးရှိပြီး ရွေးကောက်ပွဲ အပိုင်းလိုက် ကျင်းပနေမှုများကို ပါဝင်စောင့်ကြည့်လေ့လာကြမယ်လို့ စစ်ကော်မရှင်ရဲ့ သတင်းစာမှာ ထုတ်ပြန်ဖော်ပြထားပါတယ်။
ကမ္ဘာတစ်ဝှမ်းရှိ လူ့အခွင့်အရေး အဖွဲ့အစည်းများနဲ့ အစိုးရမဟုတ်တဲ့ အဖွဲ့အစည်းများက ယခုရွေးကောက်ပွဲကို စစ်ခေါင်းဆောင် မင်းအောင်လှိုင် ရဲ့ အကြွင်းမဲ့အာဏာကို တရားဝင်မှု ဖြစ်စေမယ့် ဟန်ဆောင်ရွေးကောက်ပွဲ လုပ်ရပ်ဖြစ်တယ်လို့ ရှုတ်ချခဲ့ကြပါတယ်။