စစ်တပ်ကကျင်းပမယ့် ရွေးကောက်ပွဲရက် နီးကပ်လာတာနဲ့အမျှ စစ်ခေါင်း ဆောင် ဗိုလ်ချုပ်မှူးကြီး မင်းအောင်လှိုင် ဟာ ခရစ္စမတ်ကျေးဇူးတော်ချီးမွမ်းခြင်း အခမ်းအနား တက်ရောက်ခဲ့ပြီး မဲဆွယ်စည်းရုံးခဲ့ပါတယ်။
ယမန်နေ့က ရန်ကုန်တိုင်း၊ ဗိုလ်တစ်ထောင်မြို့နယ်၊ စိန့်မေရီကာသီဒြယ် ကက်သလစ်ဘုရား ကျောင်းတော်ကြီးမှာ ကျင်းပတဲ့ ခရစ္စမတ်အခမ်းအနားပွဲတော်မှာ စစ်ခေါင်းဆောင် က ဘာသာတရား များအပေါ် အခြေခံပြီး ဖြစ်တည်လာတဲ့ ငြိမ်းချမ်းခြင်းတရားများကို ကိုယ်စီလက်ကိုင်ထားကာ တည်ငြိမ်အေးချမ်းပြီး ခေတ်မီဖွံ့ဖြိုးတိုးတက်တဲ့ ပြည်ထောင်စုကြီး ပေါ်ပေါက်လာစေရေးနဲ့ တိုင်းရင်းသားပြည်သူတစ်ရပ်လုံး လိုလားတောင့်တသည့် ပါတီစုံဒီမိုကရေစီ လမ်းကြောင်းအပေါ် ငြိမ်းချမ်းစွာ လျှောက်လှမ်းသွားနိုင်ရေး ကြိုးပမ်းဆောင်ရွက် သွားကြရန်တိုက်တွန်း စည်းရုံး ပြောဆိုခဲ့ပါတယ်။
စည်းလုံးညီညွတ်မှုပြိုကွဲအောင်၊ လေးစားယုံကြည်မှု လျော့ပါးအောင် လုပ်ဆောင်လာတဲ့ မည်သည့် သွေးထိုးနှောင့်ယှက်မှုမျိုးကိုမဆို မိသားစုစိတ်ရင်းဖြင့် လက်တွဲပူးပေါင်း ကာကွယ်သွားကြရန်လည်း စစ်ခေါင်းဆောင်က တိုက်တွန်းမှာကြားသွားပါတယ်။
ဒါ့အပြင် စစ်ရေးပစ်မှတ်မဟုတ်တဲ့ အရပ်သားပြည်သူနေထိုင်ရာဒေသတွေမှာ နေ့စဥ်ဗုံးကြဲတိုက်ခိုက် နေတဲ့ စစ်ခေါင်းဆောင်က လူသားတစ်ဦးနဲ့ တစ်ဦးကြားမှာ စွန်းထင်းနေတဲ့ အမုန်းတရားများ၊ အငြိုးအာဃာတ တရားများဟာ လူ့အသိုက်အဝန်းကြားမှာ နိုင်လိုမင်းထက်မှုများ၊ သတ်ဖြတ်ညှင်းဆဲမှုများ စတဲ့ ဒုစရိုက်တရားများကိုသာ ဆင့်ကဲဖြစ်ပေါ်စေတယ်လို့ ပြောဆိုသွားပါသေးတယ်။
ဒါ့အပြင် ချစ်ခြင်းမေတ္တာ၊ ကရုဏာတော်များကသာလျှင် ဒုစရိုက်တရားများကို ပယ်ဖျက်နိုင်မှာဖြစ်ပြီး လွှမ်းခြုံလာတဲ့ ချစ်ခြင်းမေတ္တာများနဲ့ အေးချမ်းသာယာတဲ့ ကမ္ဘာကြီးအဖြစ် ဖန်တီးနိုင်မှာဖြစ်တယ်လို့ ထည့်သွင်းပြောဆိုသွားပါတယ်။