သျှမ်း(တောင်)ရှိ ရွာငံမြို့နဲ့ သျှမ်း(ရှေ့)ရှိ တာချီလိတ်မြို့သို့မှာ တစ်ရက်ထဲ စိတ်ကြွဆေးပြား ၄၃၅၀၀၀ ပြား (ကာလတန်ဖိုး သိန်း ၄ထောင်ကျော်) ဖမ်းဆီးရမိခဲ့တယ်လို့ မြန်မာနိုင်ငံရဲတပ်ဖွဲ့ သတင်းရင်းမြစ်ထံမှ သိရပါတယ်။
သတင်းအရ မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့မှ တပ်ဖွဲ့ဝင်များ ပါဝင်တဲ့ ပူးပေါင်းအဖွဲ့ဟာ ဒီဇင်ဘာလ ၂၂ ရက်က ရွာငံမြို့နယ်ရှိ မြို့ကြီးကျေးရွာအနီးမှာ စောင့်ဆိုင်းစစ်ဆေးစဥ် နွားထိုးကြီးမြို့နယ် ဘက်မှ မောင်းနှင်လာတဲ့ HYUNDAI PORTER ယာဉ်ကို ရပ်တန့်စစ်ဆေးရှာဖွေရာခဲ့ပါတယ်။
စစ်ဆေးစဥ် ယာဥ်မောင်းဖြစ်သူ သန်းစိုးဝင်း (၄၂)နှစ် တင်ဆောင်လာတဲ့ စိတ်ကြွရူးသွပ်ဆေးပြား ၄ သိန်းပြား (ကာလတန်ဖိုး ကျပ်သိန်း ၄ ထောင်) ဖမ်းဆီးရမိပြီး ယာဥ်မောင်းကို မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားတယ်လို့ သိရပါတယ်။
အလားတူ ဒီဇင်ဘာ ၂၂ ရက်နေ့မှာပဲ သတင်းအရ သျှမ်းပြည်အရှေ့ပိုင်း၊ တာချီလိတ်မြို့၊ ပုန်းထွန်ရပ်ကွက် ကျောက်တောင်(ဝမ်မိုင်)ရှိ အိမ်ဌားတလုံးအား ဝင်ရောက်ရှာဖွေကာ နေအိမ်အတွင်း စိတ်ကြွဆေးပြား ၃၅၀၀၀ ပြား (ကာလ တန်ဖိုး ကျပ်သိန်း ၂၄၅) ဖမ်းဆီးရမိခဲ့တယ်လို့ သိရပါတယ်။
နေအိမ်အတွင်းဌားရမ်းနေထိုင်တဲ့ လေးဒေ(၁၉)နှစ် လီလှ(၁၉)နှစ်နှင့် ငြိမ်းချမ်း (၁၇) နှစ် တို့ကို မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားတယ်လို့ မြန်မာနိုင်ငံရဲတပ်ဖွဲ့သတင်းရင်းမြစ်ထံမှ သိရပါတယ်။