ရိုဟင်ဂျာများအပေါ် လူမျိုးတုံးသတ်ဖြတ်မှု စွပ်စွဲချက်နဲ့ မြန်မာနိုင်ငံကို တရားစွဲထားတဲ့အမှုကို အပြည်ပြည်ဆိုင်ရာတရားရုံး (ICJ)မှာ လာမယ့် ၂၀၂၆ ခုနှစ် ဇန်နဝါရီလ ၁၂ ရက်မှ ၂၉ ရက်အထိ ကြားနာသွားမယ်လို့ ICJ က သောကြာနေ့ က ထုတ်ပြန်ကြေညာထားပါတယ်။
ဂမ်ဘီယာနိုင်ငံ က ဇန်နဝါရီ ၁၂ ရက်မှ ၁၅ ရက်အထိ အမှုနဲ့ ပတ်သက်တဲ့ အချက်အလက်များ တင်ပြသွားမှာြဖစ်ပြီး မြန်မာနိုင်ငံဘက်ကတော့ လူမျိုးတုံးသတ်ဖြတ်မှု မရှိကြောင်း ငြင်းဆိုချက်ကို ဇန်နဝါရီ ၁၆ ရက်မှ ၂၀ ရက်နေ့အထိ တင်ပြသွားမှာဖြစ်ပါတယ်။
Genocide နဲ့ပတ်သက်ပြီး သက်သေတွေ စစ်ဆေးကြားနာဖို့ ဇန်နဝါရီ ၂၁ ရက်မှ ၂၃ ရက်အထိ ၃ ရက်ကြာ အချိန်ပေးထားပြီး တခါးပိတ်ကြားနာသွားမှာဖြစ်ပါတယ်။
ဂမ်ဘီယာက အစ္စလာမ်နိုင်ငံများအဖွဲ့ (OIC)၏ ထောက်ခံမှုနဲ့ မြန်မာနိုင်ငံဟာ ရိုဟင်ဂျာများအပေါ် လူမျိုးတုံးသတ်ဖြတ်မှု ကျူးလွန်ခဲ့တယ်လို့ ICJ မှာ တရားစွဲ ဆိုထားတာဖြစ်ပါတယ်။
ကုလသမဂ္ဂ အချက်အလက်ရှာဖွေရေး အစီရင်ခံစာအရ ၂၀၁၇ ခုနှစ်က မြန်မာစစ်တပ်က ဆောင်ရွက်ခဲ့တဲ့ စစ်ရေးလှုပ်ရှားမှုများအတွင်း “လူမျိုးတုံးသတ်ဖြတ်မှုဆိုင်ရာ လုပ်ရပ်များ” ပါဝင်ခဲ့ပြီး ရိုဟင်ဂျာ လူဦးရေ ၇ သိန်းကျော် ဘင်္ဂလားဒေ့ရှ်နိုင်ငံသို့ ထွက်ပြေးခဲ့ရတယ်လို့ ဖော်ပြထားပြီး မြန်မာနိုင်ငံက အဲ့ဒီအစီရင်ခံစာကို “ဘက်လိုက်မှုရှိတဲ့ တွေ့ရှိချက်” သာဖြစ်တယ်လို့ဆိုကာ ပယ်ချ ထားပါတယ်။
အဲ့ဒီအမှုဟာ ၁၉၄၈ ခုနှစ်က ပြဋ္ဌာန်းခဲ့တဲ့ လူမျိုးတုံးသတ်ဖြတ်မှုဆိုင်ရာ ကွန်ဗင်းရှင်း (Genocide Convention) အောက်မှာ တင်သွင်းထားတာဖြစ်ပြီး ယင်းသဘောတူညီချက်ကို မြန်မာ နဲ့ ဂမ်ဘီယာ နှစ်နိုင်ငံလုံး လက်မှတ်ရေးထိုးထားတာကြောင့် ICJ မှာ တရားစီရင်ပိုင်ခွင့် ရှိနေခြင်းဖြစ်ပါတယ်။