သျှမ်းပြည်တောင်ပိုင်း၊ မိုင်းနောင်မြို့အနီးမှာ ကျားဖြန့်လုပ်ကိုင်သူ တရုတ်နိုင်ငံသား ၂၆ ဦးနဲ့ မြန်မာနိုင်ငံသား ၈ ဦးတို့အား လက်နက်ခဲယမ်းနဲ့အတူ ဖမ်းဆီးရမိ

နိုဝင်ဘာလ ၂၄ ရက်မှ ၂၆ ရက်အထိ ကျေးသီးမြို့နယ်အတွင်း နယ်မြေလုံခြုံ ရေး ဆောင်ရွက်နေတဲ့ လုံခြုံရေးတပ်ဖွဲ့ဝင်များဟာ မိုင်းနောင်မြို့၏ အရှေ့ တောင်ဘက် နောင်တောက်ကျေးရွာ အနီး၊ ကောင်းဟိုင်းကျေးရွာအနီးနဲ့ ဝမ်ကျောင်းကျေးရွာ အနီးတဝိုက်မှာ အွန်လိုင်းငွေကြေးလိမ်လည်မှုနဲ့ လောင်းကစား အတွက် အသုံးပြုရန် ယာယီမိုးကာတဲ အလုံး ၅၀ ကျော် တွေ့ရှိကာ ကွန်ပျူတာများ၊ မီးစက်များ၊ မော်တော်ယာဥ်နဲ့ Starlink တို့ တွေ့ရှိသိမ်းဆည်းရမိတယ်လို့ ဆိုပါတယ်။

ဒါ့အပြင် ကျေးရွာအနီးမှာ သိုဝှက်ထားတဲ့ MA-1 ရိုင်ဖယ်တစ်လက်၊ MA-13 ရိုင်ဖယ်တစ်လက်၊ AK – 12 ရိုင်ဖယ်တစ်လက်၊ ကာဘိုင် တစ်လက်၊ WINCHESTER 12 V သေနတ် တစ်လက် အပါအဝင် ကျည်ဆံနဲ့ ကျည်အိမ်အမျိုးမျိုးကိုလည်း သိမ်းဆည်းရမိခဲ့ပါတယ်။

သိမ်းဆည်းရမိတဲ့ ပစ္စည်းများနဲ့ ယာယီအဆောက်အအုံများကို မီးရှို့ဖျက်ဆီးခဲ့ပြီး ပါဝင်ပတ်သက် သူများကို ဥပဒေနဲ့အညီ အရေးယူဆောင်ရွက်နိုင်ရေးနဲ့ ပြည်ပနိုင်ငံသားများကိုတော့ သက်ဆိုင်ရာ နိုင်ငံများသို့ ပြန်လည်လွဲပြောင်းပေးနိုင်ရေး ဆက်လက်ဆောင်ရွက်သွားမယ်လို့ စစ်ကော်မရှင်က ထုတ်ပြန်ထားပါတယ်။

ကျားဖြန့်လုပ်ငန်းဟာ သျှမ်းပြည်တောင်ပိုင်း ဟိုပုံး၊ မိုင်းရှူး၊ မိုင်းနောင်၊ လဲချား၊ ခိုလမ်၊ ကွန်ဟိန်းမြို့နယ်ဘက်အထိ ရောက်ရှိလာပြီး အဆိုပါ ကျားဖြန့်လုပ်ငန်းတွေကိုတော့ စစ်တပ်လက်အောက်ခံ ပြည်သူ့စစ်အဖွဲ့များက အကာအကွယ်ပေးထားတယ်လို့ ဒေသခံတွေရဲ့ ပြောပြချက်အရသိရပါတယ်။

Photo – MOI