ပတ်ဝန်းကျင်ကို အသံဆူညံ နှောက်ယှက်မှုဖြစ်စေတဲ့ ဆိုင်ကယ်ပါဝါအိတ်ဇောတပ် မောင်းနှင်တဲ့ ဆိုင်ကယ်များကို ယာဥ်ထိန်းရဲများက ဖမ်းဆီးပြီး သိမ်းဆည်းရမိတဲ့ ပါဝါအိတ်ဇော ၇၆ လုံးကို ယနေ့ နိုဝင်ဘာလ ၁၂ ရက် မွန်းလွဲပိုင်းအချိန်က နမ့်စန်မြို့ရှိ မြို့နယ်ခန်းမရှေ့မှာ လမ်းကြိတ်စက်နဲ့ ဖျက်ဆီးခဲ့တယ်လို့ သိရပါတယ်။
“လူတွေအိပ်နေတဲ့ချိန်မှာ ပါဝါအိတ်ဇောတပ်တဲ့ ဆိုင်ကယ်တွေ လီဗာအကုန်တင်ပြီး မောင်းသွား မောင်းလာလုပ်တော့ အိပ်ရေးလည်းပျက်တယ်၊ ပတ်ဝန်းကျင်ကိုလည်း စိတ်အနှောက်အယှက် ပေးတယ်၊ အခုလိုအရေးယူ ဖျက်ဆီးပစ်တာကောင်းတယ်” လို့ မြို့ခံတစ်ဦးက ပြောပါတယ်။
အများပြည်သူကို အနှောက်အယှက်ဖြစ်စေတဲ့ ပါဝါအိတ်ဇောနဲ့ သံစုံဟွန်း တပ်ဆင်မောင်းနှင်တဲ့ မော်တော်ယာဥ်တွေကို သက်ဆိုင်ရာအဖွဲ့စုံနဲ့ ဆက်ပြီးရှောင်တခင် စစ်ဆေးအရေးယူသွားမယ်လို့ သိရပါတယ်။
အမှတ်(၁၁၉)ယာဉ်ထိန်းရဲတပ်ဖွဲ့(နမ့်စန်)မှ ယနေ့ဖျက်ဆီးပစ်လိုက်တဲ့ ပါဝါအိတ်ဇော ၇၆ လုံးမှာ ကာလတန်ဖိုးအားဖြင့် ကျပ်သိန်း ၉၀ ခန့်ရှိတယ်လို့ သိရပါတယ်။