တောင်ကြီးမြို့နယ် မဲဆန္ဒနယ် အမှတ် ၁ မှာ ရွေး ကောက်ခံမယ့် PPP ပါတီက ကိုယ်စားလှယ်လောင်း ဦးစိုင်းရွှေထီးနဲ့ သားဖြစ်သူစိုင်းကျော်စိုးမိုးတို့က တန်ဆောင်မုန်း လပြည့်ည (သူခိုးကြီးည) မှာ အ ပျော်တန်းကြက်လာခိုးတဲ့ အမျိုးသားတစ်ဦးကိုဖမ်းဆီးရိုက်နှက်ခဲ့တဲ့အတွက် သေဆုံးသွားတယ်လို့ သိရပါတယ်။
နိုဝင်ဘာ ၅ ရက် နံနက် ၂ နာရီ ဝန်းကျင်ခန့်က တောင်ကြီးမြို့နယ်၊ အေးသာယာမြို့ ရပ်ကွက် ၁ နယ်မြေ ၂ မှာနေထိုင်တဲ့ လော်တာ (ခေါ် ) စိုင်းထွန်းဆာက လွှတ်တော်ကိုယ်စားလှယ်လောင်း စိုင်းရွှေထီးရဲ့ ခြံထဲက ကြက်ကို ဝင်ခိုးခဲ့ရာ သားအဖ ၂ ယောက်က တုတ်နဲ့ ဝိုင်းဝန်းရိုက်နှက်ခဲ့တဲ့အတွက် သေဆုံးသွားခြင်းဖြစ်တယ်လို့ အေးသာယာသတင်းရင်းမြစ်ဆီကသိရပါ တယ်။
” တန်ဆောင်မုန်း လပြည့်ည ဆိုတာ သူခိုး ကြီးည ပဲဗျာ အပျော်တမ်း ခိုးကြတာပဲ ဘာမှကြီးကြီးမားမားမခိုးကြပါဘူးအာဏာမရသေးဘူး ပါဝါပြနေပြီ ဒီလို ကိုယ်ထိလက်ရောက် ပြစ်မှုကျူးလွန်သူ လွတ်တော်ထဲရောက်ရင် တိုင်းပြည်က မတွေးရဲစရာပဲ ” လို့ သတင်းရင်းမြစ်က ပြောပါတယ်။
PPP ပါတီ အမတ်လောင်း စိုင်းရွှေထီး နဲ့ သားဖြစ်သူတို့ ရိုက်နက်ခံရတဲ့ စိုင်းထွန်းဆာဟာ နေအိမ်ရှေ့ ကွန်ကရစ်ခင်းထားတဲ့ ရေမြောင်းပေါ်မှာ ပက်လက်အနေအထား၊ နဖူးပေါက်ပြဲသွေးထွက်ဒဏ်ရာတွေနဲ့ လဲကျသေဆုံးနေတာဖြစ်ပြီး အမှုနဲ့ပတ်သက်လို့ တောင်ကြီးမြို့မရဲစခန်းက ရာဇသတ်ကြီးပုဒ်မ- ၃၀၂/၁၁၄ နဲ့ အမှုဖွင့်ထားတယ်လို့ သိရပါတယ်။
ပြစ်မှုကျူးလွန်သူ ဦးစိုင်းရွှေထီးဟာ လာမယ့်ရွေးကောက်ပွဲအတွက် တောင်ကြီးမြို့ မဲဆန္ဒနယ် အမှတ် ၁ က နေ ဝင်ရောက်ယှဉ်ပြိုင်ဖို့ ကိုယ်စား လှယ်လောင်း အဖြစ် မှတ်ပုံတင်ထားသူဖြစ်ပါတယ်။