ကပ္ပလီပင်လယ်ပြင်မြောက်ပိုင်းနဲ့ ဘင်္ဂလားပင်လယ် အော် အရှေ့အလယ်ပိုင်းမှာ ဖြစ်ပေါ်နေတဲ့ လေဖိအားနည်းရပ်ဝန်းအရှိန်ကြောင့် ယခု နိုဝင်ဘာလ ၂ ရက်မှ ၆ ရက်နေ့အထိ တနိုင်ငံလုံးမိုးထစ်ချုန်း ရွာနိုင်တယ်လို့ မိုးဇလဗေဒပညာရှင်က သတိပေးထုတ်ပြန်ထားပါတယ်။
ယခုဖြစ်ပေါ်နေတဲ့ ကပ္ပလီပင်လယ်မြောက်ပိုင်းမှ လေပွေလှိုင်းအရှိန်ကြောင့် တစ်နိုင်ငံလုံး မိုးထစ်ချုန်းရွာနိုင်ပြီး ရန်ကုန်၊ ဧရာဝတီ၊ ပဲခူးနဲ့ မွန်ပြည်နယ်တွေမှာ ၃ ရက်အတွင်း မိုးရေချိန် ၃ လက်မအထက် ရွာသွန်းနိုင်ပြီး နေရာကွက်၍ မိုးကြီးနိုင်တယ်လို့ ဆိုပါတယ်။
အလားတူ သျှမ်းပြည်နယ်တောင်ပိုင်းမှာလည်း ၃ ရက်အတွင်း မိုးရေချိန် ၂ လက်မအထက် ၃ လက်မနီးပါး ရွာသွန်းနိုင်တယ်လို့ မိုးဇလဗေဒပညာရှင်က ခန့်မှန်းထားပါတယ်။
ယမန်နေ့ နိုဝင်ဘာလ ၁ ရက် ည ၉ နာရီဝန်းကျင်အချိန်တွင် တောင်ကြီးမှာ မိုးရွာသွန်းလာတာကြောင့် တန်ဆောင်တိုင်မီးပုံးပျံပွဲ ဖျက်ခဲ့ရတယ်လို့ မြို့ခံတွေဆီက သိရပါတယ်။
“ ကျွန်မတို့က ဝေဂမီး ကြည့်ဖို့သွားတာ မိုးတွေရွာချလိုက်တော့ ပွဲက ပျက်သွားတယ်၊ စိန်နားပန်မီး လွတ်ဖို့ မိုင်းသွင်းနေချိန်မှာ မိုးထရွာလိုက်တော့ အဲ့မီးလည်း မီးလောင်ပြီးပျက်သွားတယ်၊ အရမ်းနမြောဖို့ကောင်းတယ်၊ မီးပုံးပျံ တစ်လုံးမှ မကြည့်လိုက်ရဘဲ မိုးစိုစိုနဲ့ ပြန်လာလိုက်ရတယ်” လို့ တန်ဆောင်တိုင်ပွဲသွားတဲ့ မြို့ခံအမျိုးသမီးတစ်ယောက်က Hsan Loi Voice ကိုပြောပါတယ်။
ယနေ့ နိုဝင်ဘာလ ၂ ရက် ညမှာ လွတ်တင်မယ့် မီးပုံးကတော့ စိန်နားပန်မီး ၆ လုံးနဲ့ ညမီးကြီး ၇ လုံးဖြစ်ကာ ရာသီဥတုအခြေအနေကြည့်ပြီး မီးပုံးပျံ လွတ်တင်သွားမယ်လို့ မီးပုံးလွတ်တင်တဲ့အဖွဲ့နဲ့ နီးစပ်သူထံမှ သိရပါတယ်။