ရွေးကောက်ပွဲပြုလုပ်ခြင်းထက် အားလုံးပါဝင်နိုင်တဲ့ နိုင်ငံရေးဆွေးနွေးပွဲကို အာဆီယံက ပိုလိုလား စစ်ခေါင်းဆောင်ကို အာဆီယံထိပ်သီးအစည်းအဝေး တက်ရောက်ခွင့် ဆက်လက်ကန့်သတ်ထား

လာမယ့် ဒီဇင်ဘာလမှာ စစ်ကော်မရှင်က ကျင်းပပြုလုပ်မယ့် ရွေးကောက်ပွဲထက် နိုင်ငံတွင်း ဖြစ်ပွားနေတဲ့ ပဋိပက္ခတွေ ရပ်တန့်ရေးနဲ့ အားလုံးပါဝင်နိုင်တဲ့ နိုင်ငံရေးဆွေးနွေးပွဲကို ရွေးကောက်ပွဲ မကျင်းပခင်မှာ လုပ်ဆောင်ရမယ်လို့ အာဆီယံထိပ်ပိုင်း ခေါင်းဆောင်များက အလေးပေး ပြောကြား သွားပါတယ်။

မြန်မာနိုင်ငံမှာ ပိုမိုဆိုးရွားလာတဲ့ ပဋိပက္ခများ၊ လူသားချင်းစာနာမှုဆိုင်ရာ အကျပ်အတည်းနဲ့ အာဆီယံ ဘုံသဘောတူညီချက် ၅ ချက်ကို အကောင်အထည်ဖော်ရာမှာ သိသာထင်ရှားတဲ့ တိုးတက်မှု မရှိခြင်း အပေါ် အလွန်အမင်း စိုးရိမ်တယ်လို့ ယမန်နေ့က အာဆီယံခေါင်းဆောင်များ၏ သုံးသပ်ဆွေးနွေး ဆုံးဖြတ်ချက်အရ သိရပါတယ်။

ဘုံသဘောတူညီချက် ၅ ချက် အကောင်အထည်ဖော်ရာမှာ တိုးတက်မှု မရှိမချင်း အာဆီယံထိပ်သီး အစည်းအဝေးများတွင် စစ်ခေါင်းဆောင် တက်ရောက်ခြင်းကို ဆက်လက်ကန့်သတ်ထားမှာဖြစ်ပြီး နိုင်ငံရေးနဲ့ မသက်ဆိုင်တဲ့ ကိုယ်စားပြုမှုကိုသာ တက်ရောက်ခွင့်ပြုထားမယ်လို့ ဆုံးဖြတ်ထား ကြပါတယ်။

မြန်မာနိုင်ငံရဲ့ နိုင်ငံရေးအကျပ်အတည်းကို ဖြေရှင်းရန်အတွက် အချက် ၅ ချက်ပါ ဘုံသဘောတူညီချက် (5PC)ကို အဓိကမူဘောင်အဖြစ် ဆက်လက်တည်ရှိနေမည်ဖြစ်ပြီး အရပ်သားများနှင့် နေအိမ် အဆောက်အအုံများအပေါ် ပစ်မှတ်ထား တိုက်ခိုက်နေတဲ့ အကြမ်းဖက်မှုများတွင် ပါဝင်ပတ်သက်သူ အားလုံးမှ ရပ်တန့်ရန် တိုက်တွန်းထားပါတယ်။

လက်ရှိဖြစ်ပေါ်နေတဲ့ နိုင်ငံအတွင်းအခြေအနေများနဲ့ ပြုလုပ်ရန် ပြင်ဆင်နေတဲ့ ရွေးကော်ပွဲအတွက် မြန်မာနိုင်ငံဘက်မှ အစီရင်ခံတင်ပြလာမှုများအပေါ် အာဆီယံက မှတ်သားထားတယ်လို့ သိရပါတယ်။