သျှမ်းပြည်မြောက်ပိုင်း၊ ကျောက်မဲမြို့တွင်းဝန်းကျင်မှာ ယနေ့ အောက်တိုဘာ လ ၁ ရက်နေ့ မွန်းလွဲပိုင်းအချိန်တွင် စစ်ကော်မရှင်တပ်က ဝင်ရောက်ထိန်းချုပ်နိုင်ခဲ့တယ်လို့ ဒေသတွင်းသတင်းရင်းမြစ်နဲ့ စစ်တပ်ထောက်ခံ တယ်ရီဂရမ်ချန်နယ်က ယနေ့ညနေပိုင်းက ရေးသားဖော်ပြလာပါတယ်။
ကျောက်မဲမြို့တစ်ခုလုံးကို စစ်ကော်မရှင်တပ်က အလုံးစုံ ပြန်လည်ထိန်းချုပ်နိုင်သေးတာ မဟုတ်ဘဲ မြို့ပြင်ရှိ တိုးဂိတ်အနီးမှာ TNLA နဲ့ စစ်ကော်မရှင်တပ်တို့ကြား တိုက်ပွဲဆက်လက်ပြင်းထန်နေတယ်လို့ သိရပါတယ်။
“ စစ်တပ်က မြို့ထဲကို ဝင်လာပြီ၊ မြို့ရဲ့ အလုံးစုံကိုတော့ မသိမ်းနိုင်သေးဘူး၊ အခုအေးရှားဝေါလ်တိုးဂိတ် ဘက်မှာ ပစ်ခတ်ကြတုန်းပဲ” လို့ မြို့ခံတွေဆီက သိရပါတယ်။
ကျောက်မဲမြို့ လက်ရှိအခြေအနေနဲ့ ပတ်သက်ပြီး TNLA ဘက်က တစ်စုံတရာထုတ်ပြန်ထားတာမရှိသေးပါဘူး။
ကျောက်မဲမြို့ဟာ တရုတ်−မြန်မာ နယ်စပ်ကုန်သွယ်ရေးအတွက် အရေးပါတဲ့ မြို့တစ်မြို့ဖြစ်ပြီး ဇူလိုင်လအတွင်းက နောင်ချိုမြို့ကို စစ်ကော်မရှင်တပ်က ပြန်လည်သိမ်းပိုက်နိုင်ခဲ့ပြီးနောက် ကျောက်မဲမြို့ကို ဆက်လက်ထိုးစစ်ဆင်နေတာပဲဖြစ်ပါတယ်။