ရှမ်းပြည်တောင်ပိုင်း ၊ တောင်ကြီးမြို့နယ်မှာလာရောက် နေ ထိုင်တဲ့ လားရှိုးမြို့က စစ်ရှောင်အမျိုးသားကို ရွေးကောက်ပွဲ အပေါ်ဝေဖန်မှုနဲ့ ထောင် ၇ နှစ် ချလိုက်တယ်လို့ စစ်ကော်မရှင်သတင်းချန်နယ်မှာကြေငြာထားပါတယ်။
ဩဂုတ် ၂၅ ရက်မှာ တောင်ကြီးမြို့နယ်၊ အေးသာယာမြို့၊ ရပ်ကွက် ၁ က အသက် ၃၆ နှစ်အရွယ် ကိုနေသွေး ဟာ “Lashio Baegyi” ဆိုတဲ့ ဖေ့စ်ဘွတ်အကောင့် နဲ့ လားရှိုးမြို့ပေါ်က သေနတ်ပစ်ဖောက် ကားလုယက် မှုဖြစ်စဥ်တစ်ခုကို share လိုက်ပြီး ခေါင်းစဥ်အနေနဲ့
“ ပြည်သူများကို မဲပေးရန်သာ တိုက်တွန်းနေပြီး လုံခြုံ ရေး မရှိဖြစ်နေသော အခြေအနေကို ထောက်ပြကာ ” ပြည်သူ့ဆန္ဒမဲ ကိုသာ လိုချင်ပြီး အဖြစ်မရှိ” လို့ဝေဖန်ခဲ့တယ်လို့ သိရပါတယ်။
စစ်ကော်မရှင်လုပ်မယ့် ရွေးကောက်ပွဲကို ပျက်ပြားအောင် လုပ်ဆောင်မှုနဲ့ တောင်ကြီးမြို့နယ်၊ အေးသာယာနယ်မြေရဲစခန်းက (ပ) ၉၉/၂၀၂၅၊က ပါတီစုံဒီမိုကရေစီ အထွေထွေ ရွေးကောက်ပွဲတွေကို နှောင့်ယှက် ဟန့်တားဖျက်စီးခြင်းမှ ကာကွယ်ပေးရေးဥပဒေပုဒ်မ ၂၃ (က) အရ အမှုဖွင့်စစ်ဆေးခဲ့ပြီး တောင်ကြီးမြို့နယ်တရားရုံးက ရာဇဝတ်အမှတ် ၂၇၁၄ /၂၀၂၅ နဲ့ လက်ခံစစ်ဆေးခဲ့တယ်လို့ ထုတ်ပြန်ချက်တွေအရ သိရပါတယ်။
တရားရုံးက ပြစ်မှုထင်ရှားတယ်ဆိုပြီး ကိုနေသွေး ကို ပါတီစုံဒီမိုကရေစီ အထွေထွေရွေးကောက်ပွဲကို နှောင့် ယှက် ဟန့်တားဖျက်စီးခြင်းမှ ကာကွယ်ပေးရေးဥပဒေပုဒ်မ ၂၃ (က) အရ အလုပ် နဲ့ ထောင်ဒဏ် ၇ နှစ်ချမှတ်လိုက်တယ်လို့ ထုတ်ပြန်ထားပါတယ်။
စစ်ကော်မရှင်က ပါတီစုံဒီမိုကရေစီ အထွေထွေရွေး ကောက်ပွဲကို နှောင့်ယှက် ဟန့်တားဖျက်စီးခြင်းမှ ကာကွယ်ပေးရေးဥပဒေကို ၂၀၂၅ခုနှစ် ဇူလိုင် ၂၉ မှာ ထုတ်ပြန်ခဲ့တာဖြစ်ပြီး အဲ့ဒီဥပဒေနဲ့ ဖမ်းဆီးခံရသူ ၃ ဦးရှိလာပြီဖြစ်ပြီး ကိုနေသွေးက ပထမဆုံး ထောင်ဒဏ်ချမှတ်ခံရသူဖြစ်တယ်လို့ သိရပါတယ်။
