မိုးသည်းထန်စွာ ရွာသွန်းပြီးနောက် မြန်မာ-ထိုင်းနယ်စပ်ရှိ မယ်ဆိုင်ချောင်းရေမြင့်တက်လာတာကြောင့် တာချီလိတ်မြို့ အနိမ့်ပိုင်းရပ်ကွက်တွေမှာ ရေကြီးမှု ဒဏ်ထပ်မံခံစားနေရပါတယ်။
ယနေ့ မေလ ၂၄ ရက်နေ့ နံနက်အစောပိုင်း ၁ နာရီ ကျော်မှ စတင်ကာ မယ်ဆိုင်ချောင်းရေများ မြင့်တက်လာပြီး တာချီလိတ်မြို့ရှိ တာလော့ ၊ ပုန်းထွန် ၊ မကာဟိုခမ်း ၊ ဆန်ဆိုင်း(က)၊ ဆန်ဆိုင်း(ခ)နဲ့ မယ်ခေါင်စတဲ့ ရပ်ကွက်များအတွင်း ရေများဝင်ရောက်နေတယ်လို့ ဒေသတွင်း သတင်းရင်းမြစ်ထံမှ သိရပါတယ်။
ရပ်ကွက်တွင်း ရေများထပ်မံဝင်ရောက်လာတာကြောင့် ရပ်ကွက်နေပြည်သူများ အချိန်မှီ ဘေးလွှတ်ရာသို့ ပြောင်းရွှေ့ရန် အာဏာပိုင်တွေက အသိပေးထားတယ်လို့ သိရပါတယ်။
ဒါအပြင် မယ်ဆိုင်ချောင်းအတွင်း အမှိုက်သရိုက်များ ဆယ်ယူရှင်းလင်းနိုင်ရန်အတွက် တာချီလိတ်-မယ်ဆိုင် အမှတ်(၁)တံတားကို ၂ နာရီခန့် ခေတ္တပိတ်ထားမယ်လို့ ထိုင်းဘက်က လာတဲ့သတင်းအရ သိရပါတယ်။
