TNLA ထိန်းချုပ်နယ်မြေတွေဖြစ်တဲ့ နမ့်ခမ်းနဲ့ နမ့်ဆန်မြို့နယ်တို့မှာ ပထမဆုံးအနေနဲ့ မော်တော်ယာဥ် လိုင်စင်များ ပြုလုပ်ပေးမှာဖြစ်ပြီး အခွန်ငွေနဲ့ ဝန်ဆောင်ခကိုတော့ ကျပ် ၂ သိန်းမှ ၅ သိန်းအထိ ပေးဆောင်ရမယ်လို့ TNLA က ယနေ့ မေလ ၂၂ ရက်မှာ ထုတ်ပြန်ထားပါတယ်။
မော်တော်ယာဥ်လိုင်စင်များကို PSLF/TNLA ရဲ့ မော်တော်ယာဥ်မှတ်ပုံတင်ကြီးကြပ်ရေးဌာနမှ လာမယ့် မေလ (၂၅)ရက်တွင် စတင်ပြုလုပ်ပေးသွားမှာဖြစ်ပြီး အိမ်စီးကား၊ လုပ်ငန်းသုံးကား၊ ခရီးသည်တင် ကားနဲ့ ကုန်တင်ကားများကို လိုင်စင် ပြုလုပ်ပေးသွားမှာြဖစ်ပြီး လိုင်စင်သက်တမ်း ၂ နှစ်ရှိတယ်လို့ ဆိုပါတယ်။
မော်တော်ယာဥ် လိုင်စင်များကို စီမံချက်ကာလအနေနဲ့ မေလ (၂၅)ရက်မှ ဒီဇင်ဘာလ (၃၁)ရက်အထိ (၆)လသာ ပြုလုပ်ပေးမှာဖြစ်ပြီး စီမံချက်ကာလ ကျော်လွန်သွားပါက လိုင်စင် မတင်သေးတဲ့ ယာဥ်များကို အရေးယူဆောင်ရွက်သွားမယ်လို့လည်း TNLA က ဆိုပါတယ်။
မော်တော်ယာဉ်များကို လိုင်စင်ပြုလုပ်ပေးရခြင်းဟာ မော်တော်ယာဉ်များနဲ့ သက်ဆိုင်တဲ့ ပိုင်ဆိုင်မှု၊ ရောင်းဝယ်မှု၊ ယာဉ်တိုက်မှုနဲ့ ယာဉ်ပျောက်ဆုံးမှု အစရှိတဲ့ ပြဿနာများလျော့ကျစေရန်အတွက်လို့ ဆိုပါတယ်။
ပြည်တွင်းမှာ လိုင်စင်မဲ့ကားနဲ့ ဆိုင်ကယ်များ စီးနင်းမှုမရှိစေရေး စိစစ်ဖော်ထုတ် အရေးယူသွားရန် ယမန်နေ့က စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် က ပြောဆိုမှုအပြီး TNLA က ၎င်းတို့ ထိန်းချုပ်တဲ့ နယ်မြေအတွင်းမှာ မေလ ၂၅ ရက်က စတင်ပြီး မော်တော်ယာဥ်လိုင်စင် လုပ်ပေးမယ်လို့ ထုတ်ပြန်လာ တာပဲဖြစ်ပါတယ်။
