သျှမ်းပြည်နယ်မြောက်ပိုင်း လားရှိုးလေကြောင်းလိုင်းခရီးစဥ်ကို လာမယ့် မေလ ၂၀ ရက်နောက်ပိုင်းမှာ ပြန်လည်ပြေးဆွဲဖို့ တရုတ်အကူအညီနဲ့ မြို့ကိုပြန်လည်ထိန်းချုပ်တဲ့ စစ်ကောင်စီက ပြင်ဆင်နေတယ်လို့ ဒေသခံ သတင်းရင်းမြစ်ဆီက သိရပါတယ်။
“ မေလ ၂၂ ရက်နေ့မှာ လေကြောင်းလိုင်းတွေ ပြန်ဖွင့်မယ်လို့ကြားပါတယ်၊ အွန်လိုင်းပေါ်မှာလည်း လေယာဥ်လက်မှတ်တွေ စတင်ရောင်းနေကြပြီ၊ အခုလို လေဆိပ်တွေပြန်ဖွင့်မယ်ဆိုတော့ ဝမ်းသာပါတယ်၊ သွားလာဖို့အတွက် ခရီးပိုတွင်တာပေါ့” လို့ လားရှိုးဒေသခံတစ်ဦးက Hsan Loi Voice ကို ပြောပါတယ်။
လားရှိုးလေဆိပ်ကို လာမယ့် မေလ ၂၂ ရက်နေ့မှာ ပြန်လည်ဖွင့်လှစ်မှာဖြစ်ပြီး လားရှိုး−မန္တလေး၊ လားရှိုး−ရန်ကုန်နဲ့ လားရှိး−တာချီလိတ် စတဲ့ ခရီးစဥ်တွေနဲ့ ပြေးဆွဲမှာဖြစ်တယ်လို့ ပြည်တွင်းပြည်ပ လေယာဥ်လက်မှတ် အရောင်းဌာနများထံမှ သိရပါတယ်။
လားရှိုး လေကြောင်းခရီးစဥ်ပျံသန်းမှုကို ပြီးခဲ့တဲ့ ၁၀၂၇ စစ်ဆင်ရေးအတွင်း ၂၀၂၄ ခုနှစ် ဇူလိုင်လ ၃ ရက်က စတင်ရပ်နားထားတာဖြစ်ပြီး ကိုးကန့်တပ် MNDAA က ဇူလိုင်လကုန်မှာ သိမ်းပိုက်နိုင်ခဲ့ တာဖြစ်ပါတယ်။
ယခု တရုတ်ကြားဝင်စေ့စပ်မှုနဲ့ လားရှိုးမြို့ကို ပြီးခဲ့တဲ့ ဧပြီလ ၂၂ ရက်နေ့က စစ်ကောင်စီတပ်က မြို့ကို ပြန်လည်ထိန်းချုပ်ပြီး အုပ်ချုပ်ရေးယန္တယား ဖော်ဆောင်နေတာပဲဖြစ်ပါတယ်။
