လာမယ့် ဧပြီလမှစပြီး ကမ္ဘာ့စားနပ်ရိက္ခာအစီအစဉ် (World Food Programme – WFP)က မြန်မာနိုင်ငံ ရှိ လူဦးရေ တစ်သန်းအတွက် စားနပ် ရိက္ခာ အထောက်အပံ့များ ဖြတ်တောက်သွားမယ်လို့ WFP က သတိပေးကြေညာခဲ့ပါတယ်။
ယခု အကူအညီဖြတ်တောက်ရခြင်းမှာ ရန်ပုံငွေအခက်အခဲများ ကြုံတွေ့နေရတဲ့အတွက်ကြောင့် ဟုဆိုပြီး အသက်ရှင်သန်ရေးအတွက် WFP အထောက်အပံ့ တစ်ခုတည်းကိုသာ မှီခိုနေရတဲ့ နိုင်ငံတစ်ဝန်းက ရပ်ရွာလူထုများအပေါ် သက်ရောက်မှုရှိတယ်လို့ WFP ရဲ့ ဌာနေကိုယ်စားလှယ်က သတိပေးပြောကြားထားပါတယ်။
နိုင်ငံအတွင်း ပဋိပက္ခတိုးပွားလာခြင်း၊ ရွှေ့ပြောင်းနေထိုင်သူများ တိုးလာခြင်းနဲ့ အကူအညီရရှိရန် ကန့်သတ်ချက်များ ပိုမိုတင်းကျပ်လာခြင်းတို့ကြောင့် စားနပ်ရိက္ခာအထောက်အပံ့ လိုအပ်ချက်များ သိသိသာသာ မြင့်တက်နေချိန်မှာ WFP မှ အထောက်အပံ့ ဖြတ်တောက်မှုများ ဖြစ်ပေါ်လာရခြင်း ဖြစ်ပါတယ်။
ကုလသမဂ္ဂ၏ လူ့အခွင့်အရေးဆိုင်ရာ ကျွမ်းကျင်ပညာရှင်များရဲ့ ပြောကြားချက်အရ မြန်မာနိုင်ငံက လူဦးရေ သန်း ၂၀ နီးပါးသည် လူသားချင်းစာနာမှုဆိုင်ရာ အကူအညီများ လိုအပ်နေပြီး ခန့်မှန်းခြေ ၁၅ ဒသမ ၂ သန်း (နိုင်ငံ၏ လူဦးရေစုစုပေါင်း သုံးပုံတစ်ပုံခန့် )သည် ပြင်းထန်သော စားနပ်ရိက္ခာ မလုံလောက်မှုကို ရင်ဆိုင်နေရတယ်လို့ သိရပါတယ်။
