ထိုင်းနိုင်ငံ၊ ဆူရတ်ဌာနီပြည်နယ်မှာရှိတဲ့ Koh Phangan International Church ကျောင်းမှာရှိတဲ့ မြန်မာကျောင်းသား(၁၉၀)ကျော် ပညာသင်ကြားနေသော စာသင်ကျောင်းတစ်ကျောင်း ကို ခွင့်ပြုချက်မရှိဘဲ တရားမဝင်ဖွင့်လှစ်ထားတယ်လို့ဆိုကာ ယမန်နေ့က ထိုင်းအာဏာပိုင်များက ဝင်ရောက်စစ်ဆေးပြီး မြန်မာစာသင်ကြားသူ ဆရာ/မ (၄)ဦးအား ဖမ်းဆီးခဲ့ကြောင်း ထိုင်းသတင်းများ ထံမှ သိရပါတယ်။
အာဏာပိုင်များ စစ်ဆေးရာတွင် အဆိုပါကျောင်းကို မြန်မာကလေးငယ် (၁၉၀)ကျော် ပညာ သင်ကြားနေပြီး မြန်မာရွေ့ပြောင်းအလုပ်သမားများရဲ့ ကလေးငယ်များဖြစ်ကြကာ ကျောင်းသားတစ်ဦး ကို တစ်လအတွက် ဘတ် ၃၀၀ မှ ၅၀၀ အထိ ကောက်ခံတယ်လို့ သိရပါတယ်။
လက်ရှိကျောင်းကိုတော့ ပိတ်သိမ်းထားပြီး ကျောင်းနဲ့ ပါဝင်ပတ်သက်သူများကို “ခွင့်ပြုချက်မရှိဘဲ ကျောင်းတည်ထောင်ခြင်းနဲ့ အလုပ်လုပ်ကိုင်ခွင့်လိုင်စင်မရှိဘဲ အလုပ်လုပ်ကိုင်ခြင်း” စတဲ့အချက်တွေနဲ့ တရားစွဲဆိုထားတယ်လို့ ထိုင်းသတင်းမှာ ဖော်ပြထားပါတယ်။
ပြီးခဲ့တဲ့ ၂၀၂၄ ခုနှစ်အတွင်းကလည်း ထိုင်းနိုင်ငံအတွင်း မြန်မာရွေ့ပြောင်းအလုပ်သမားများရဲ့ ကလေးများကို ပညာသင်ကြားပေးတဲ့ မြန်မာကျောင်း(၆)ကျောင်းကို တရားမဝင်ဖွင့်လှစ်သင်ကြားတယ် လို့ဆိုပြီး ထိုင်းအာဏာပိုင်တွေက ပိတ်သိမ်းလိုက်တာဖြစ်ပါတယ်။
