သျှမ်းပြည်နယ်အရှေ့ပိုင်း၊ တာချီလိတ်မြို့ရှိ ပုန်းထွန်ရပ်ကွက်မှ အသက် (၂၀) ကျော် အမျိုးသားတစ်ဦး ဓါးဒဏ်ရာနဲ့ သေဆုံးနေကြောင်း ဒေသတွင်း သတင်းရင်းမြစ်မှသိရပါတယ်။
ယနေ့ ဇန်နဝါရီလ(၉)ရက် နံနက်ပိုင်းက တာချီလိတ်-မိုင်းဆတ်သွား ကားလမ်းမဘေးရှိ နေအိမ်တစ်လုံးထဲမှ အမျိုးသားတစ်ဦး သွေးထွက်ဒဏ်ရာများနဲ့ လဲကျနေသည်ကို ရပ်ကွက်ပြည်သူများက တွေ့ရှိပြီး ဦးလှမိုး လူမှုကူညီရေး အသင်းသို့ အကူအညီတောင်းခံကာ အသင်းမှ ပြည်သူ့ဆေးရုံသို့ သွားရောက်ပို့ဆောင်ချိန်မှာ သေဆုံးသွားတယ်လို့ သိရပါတယ်။
သေဆုံးသွားတဲ့အမျိုးသားသည် အသက်(၂၁)နှစ်အရွယ်ရှိ မောင်အာကာမင်း ဖြစ်ပြီး ဦးခေါင်းနောက်စေ့နဲ့ ဝဲဘက်လက်ပြင်မှာ ပြတ်ရှဒဏ်ရာရရှိမှုနဲ့ သေဆုံးသွားကာ ဘယ်အဖွဲ့အစည်းက ဘာရည်ရွယ်ချက်နဲ့ ဓါးဖြင့် ဝင်ခုတ်သွားတယ်ဆိုတာ တာဝန်ရှိသူတွေက ဆက်လက်စုံစမ်းနေတယ်လို့ သိရပါတယ်။
ပြီးခဲ့သည့် နိုဝင်ဘာလ(၈)ရက် ညပိုင်းက တာချီလိတ်မြို့၊ ဆန်ဆိုင်း(ခ) ရပ်ကွက်မှ အမျိုးသား တစ်ဦးလည်း သေနတ်ပစ်ခတ်ခံခဲ့ရပြီး ပြန်ပေးဆွဲမှု၊ လုယက်မှုနဲ့ ပစ်ခတ်မှုတွေ တာချီလိတ်မှာ မကြာခဏဖြစ်ပွားနေတယ်လို့ သိရပါတယ်။