သျှမ်းပြည်နယ်တောင်ပိုင်း ရပ်စောက်မြို့နယ်၊ အင်တောဒေသအတွင်း လှုပ်ရှားနေတဲ့ RCSS နှင့် SSPP တို့ နှစ်ဖက်တပ်ဖွဲ့ ထိတွေ့တိုက်ပွဲမှုဖြစ်ပွားကြောင်း သိရသည်။
ယနေ့ ဒီဇင်ဘာလ(၂၈)ရက် နံနက်(၅)နာရီဝန်းကျင်က အင်တောမြို့ မြောက်ဘက်မှာ နှစ်ဖက်တပ်ဖွဲ့ ထိတွေ့ တိုက်ပွဲဖြစ်ပွားပြီး ထိခိုက်ဒဏ်ရာရရှိမှုများ ရှိကြောင်း သိရသည်။
“RCSS နဲ့ SSPP တိုက်ပွဲဖြစ်တာ မှန်ပါတယ်၊ နှစ်ဖက်ထိခိုက်မှုရှိတယ်တော့ သိထားတယ်၊ အသေးစိတ်တော့ သေချာမသိသေးဘူး” လို့ စစ်ရေးသတင်းရင်းမြစ်ထံမှ သိရသည်။
သျှမ်းလက်နက်ကိုင်တပ်ဖွဲ့များဖြစ်ကြသည့် RCSS နဲ့ SSPP တို့သည် ပြီးခဲ့သည့် ၂၀၂၃ခုနှစ် နိုဝင်ဘာလ(၂၉)က နှစ်ဖက်အပစ်အခတ်ရပ်စဲရေး သဘောတူ လက်မှတ်ရေးထိုးခဲ့ကြပေမယ့် ၂၀၂၄ ခုနှစ် ဖေဖော်ဝါရီလ နောက်ပိုင်းမှာ မကြာခဏတိုက်ပွဲပြန်လည်ဖြစ်ပွားကြောင်း သိရသည်။
သျှမ်းပြည်နယ်အတွင်းက သံဃာတော်များနှင့် သျှမ်းပြည်သူလူထုများအနေဖြင့် အဆိုပါ သျှမ်းတပ်ဖွဲ့ နှစ်ဖွဲ့အား ထာဝရပေါင်းစည်းရေးကို လိုလားနေကြကြောင်း ဆိုရှယ်မီဒီယာ ပလက်ဖောင်း များမှတဆင့် တိုက်တွန်းထားပါသည်။
