သျှမ်းပြည်နယ်တောင်ပိုင်း တောင်ကြီး – ဆိုက်ခေါင်-မောက်မယ်-မိုးနဲ ကားလမ်းပိုင်းမှာ လက်နက်ကိုင်အဖွဲ့ပေါင်းစုံက အခွန်များ အဆမတန်ကောက်ခံကာ ၆ ဘီးကားတစ်စီးကို အသွားအပြန် ကျပ် ၆ သိန်းခန့် ပေးဆောင်နေရလို့ ကုန်ကားသမားများ အခက်တွေ့နေကြောင်း စုံစမ်းသိရသည်။
” သူတို့က ကားပေါ်ဘာတင်လာတာလဲ သေချာ တော့မစစ်ဘူး၊ ပိုက်ဆံအဓိကပဲ၊ ၅ထောင်ပေးရင်လည်း မရဘူး၊ တစ်သောင်းနှစ်သောင်းလောက်ပေးရတယ်၊ စားသောက်ကုန် တင်လာတဲ့ကားဆို ပိုပေးရတယ်” လို့ ကားသမားထံမှ သိရသည်။
အိမ်စီးကားများအနေဖြင့် ကောက်ခံခြင်းမရှိပေမယ့် ကုန်ကားများ၊ ပြောင်းနှင့် နွားတင်ဆောင်လာသောကားများထံမှ အခွန်ကို အဓိက ကောက်ခံနေပြီး ခြောက်ဘီး၊ဆယ်ဘီးနှင့် ဆယ့်နှစ်ဘီးကား အမျိုးအစားပေါ်မူတည်ပြီး အခွန်များကောက်ခံနေကြောင်း သိရသည်။
” အရင်တုန်းက အဲ့လမ်းပိုင်းဆို သောင်းဂဏာန်း လောက်ပဲကုန်တယ်၊ အခု ဂိတ်တွေလည်းများလာတော့ ပေးရတဲ့ ဂိတ်ကြေးတွေက သိန်းဂဏာန်းအထက်ပဲ၊ ကိုယ့်အတွက် အမြတ်လည်း သိပ်မကျန်တော့ အလုပ်လုပ်ရတာလည်း မပျော်တော့ဘူးပေါ့” လို့ ကားသမားတစ်ဦးက Hsan Loi Voice ကိုပြောသည်။
ပြီးခဲ့သည့် အောက်တိုဘာလတုန်းက တောင်ကြီး- လွိုင်လင် လမ်းပိုင်းမှာ တောင်ပြိုမှုဖြစ်ပြီး ကားလမ်းများပိတ်ပြီးသည့်နောက်ပိုင်း သျှမ်းရှေ့မှ ကုန်ကားသမားများအနေနဲ့ တောင်ကြီး- ဆိုက်ခေါင်- မောက်မယ်- မိုးနဲ-နမ့်စန် လမ်းကို အဓိကအသုံးပြုလာပြီး သွားလာရအဆင်ပြေစေရန် အခွန်များကို တောင်းသလောက်ပေးနေရတာကြောင့် နောက်ပိုင်းတွင် အခွန်ခများပိုတိုးကောက်လာကြောင်း သိရသည်။
အဆိုပါလမ်းပိုင်းသည် ဂိတ် ၁၆ ဂိတ်ခန့်ရှိနေပြီး စစ်ကောင်စီဂိတ်(၅)ဂိတ်၊ PNO ပြည်သူ့စစ်ဂိတ် (၉) ဂိတ် နှင့် RCSS ဂိတ်(၂)ဂိတ်တို့ရှိကြောင်း အဆိုပါလမ်းပိုင်း အသုံးပြုသွားလာသူများထံမှ သိရသည်။
