သျှမ်းပြည်နယ်တောင်ပိုင်း၊ တောင်ကြီးမြို့တွင် စစ်ကောင်စီ၏ စစ်မှုထမ်းဥပဒေကြောင့် ညပိုင်းတွင် လူငယ်လူရွယ်များ ပေါ်တာဆွဲခံနေရပြီး ည ၈ နာရီနောက်ပိုင်းတွင် လူသွားလူလာ နည်းပါးပြီး တိတ်ဆိတ်နေကြောင်း သိရသည်။
စစ်ကောင်စီ မှ ရပ်ကွက်အုပ်ချုပ်ရေးမှူးများကို စစ်မှုထမ်းရန် လူစာရင်းပေးဖို့ ဖိအားပေးသဖြင့် မည်သည့်အချိန်မှာစစ်မှုထမ်း လာခေါ်ခံရမည်ကိုမသိရှိတဲ့အတွက် ရပ်ကွက်နေပြည်သူများလည်း စိုးရိမ်နေကြကြောင်း တောင်ကြီးမြို့ခံဆီက သိရသည်။
ထို့ပြင် တောင်ကြီး အထက ၅ ရှေ့နှင့် အထက ၃ ရှေ့ရှိ ညဈေးတန်းများလည်း ည ၈ နာရီကျော်မှာ ဈေးဆိုင်များ ပိတ်သိမ်းလာကြပါသည်။
” အခုအစ်မတို့ဆိုင်က စောစောဖွင့်ပြီး စောစောသိမ်းနေရတယ်၊ ည ၈ နာရီကျော်ဆို လာဝယ်စားတဲ့လူလည်း မရှိတော့ စောစောသိမ်းလိုက်တယ်၊ ညဖက်ဆို ပေါ်တာဆွဲတာတွေ ရှိနေတော့ ဘယ်သူမှ သိပ်မထွက်ရဲကြဘူးလေ” လို့ ဈေးသည်တစ်ဦးက Hsan Loi Voice ကိုပြောသည်။
စစ်ကောင်စီသည် ယခင်က အသက် ၁၈ နှစ်မှ ၃၅နှစ်အတွင်းရှိ အမျိုးသားများကို ပြည်သူ့စစ်မှုထမ်းရန်အတွက် ခေါ်ယူခဲ့ပြီး ပညာတတ် လူငယ်များ စစ်မှုထမ်းရန် သွားရောက်ခြင်း မရှိသည့်အတွက် ညပိုင်းအချိန်မှာ စစ်ကောင်စီတို့ အုပ်စုဖွဲ့ပြီး ပေါ်တာဆွဲနေကြောင်း ဒေသခံတွေဆီက သိရပါသည်။
