ပြီးခဲ့သည့် ရက်ပိုင်းက သျှမ်းပြည်နယ်တောင်ပိုင်း၊ ပင်းတယမြို့နယ်ရှိ နတ်အင်းကျေးရွာတွင်းမှာ လှုပ်ရှားနေသည့် သျှမ်းပြည်ပြန်လည်ထူထောင်ရေးကောင်စီ RCSS စစ်ကြောင်းအား စစ်ကောင်စီက ထိုးစစ်ဆင် တိုက်ခိုက်ကြောင်း သိရသည်။
နှစ်ဖက်တိုက်ပွဲအတွင်း RCSS ဘက်မှာလည်း တစ်ဦး ကျဆုံးသလို စစ်ကောင်စီဘက်က ၂ ဦးသေဆုံးပြီး ၃ ဦး ဒဏ်ရာရရှိတယ်လို့ ဒေသတွင်းကလာတဲ့ သတင်းရင်းမြစ်ကပြောထားပေမယ့် Hsan Loi Voice အနေဖြင့် သီးခြားအတည်ပြုလို့မရသေး ပါ။
ယခု ပင်းတယမြို့နယ်မှာ ဖြစ်ပွားနေသည့် တိုက်ပွဲနှင့် ပတ်သက်ပြီး RCSS ဘက်မှ တာဝန်ရှိသူများအား မေးမြန်နိုင်ရန် ဖုန်းဆက်သွယ်ခဲ့ပေမယ့် လက်ခံဖြေဆိုတာ မရှိပါဘူး။
စစ်ကောင်စီနှင့် RCSS တို့ ပင်းတယမြို့နယ်မှာ ဖြစ်ပွားသည့် နှစ်ဖက်တိုက်ပွဲနှင့် ပတ်သက်ပြီး RCSS နှင့် စစ်ကောင်စီတို့ဘက်မှ ယနေ့ထိ ထုတ်ပြန်ချက်တစ်စုံတစ်ရာထုတ်ပြန်ထားတာမရှိသေးပါ။
ပြီးခဲ့သည့် စက်တင်ဘာလ (၁၉)ရက်က သျှမ်းပြည်နယ်အရှေ့ပိုင်း၊ မိုင်းပျဉ်းမြို့နယ်၊ ယင်းခမ်းရွာရှိ RCSS တပ်စခန်းကို စစ်ကောင်စီနှင့်ပြည်သူ့စစ် အပါ အဝင် အင်အား(၁၀၀)ခန့်က လာရောက်တိုက်ခိုက်ပြီး စစ်ကောင်စီဖက်မှ(၁)ဦးနှင့် ပြည်သူ့စစ် (၄)ဦးသေဆုံးကာ လက်နက်ခဲယမ်းများ သိမ်းဆည်းရမိကြောင်း သိရသည်။
