သျှမ်းပြည်နယ်မြောက်ပိုင်း၊ ကွတ်ခိုင်မြို့ကို ယမန်နေ့ နိုဝင်ဘာလ(၁၇)ရက် ညသန်းခေါင်းယံချိန်မှာ စစ်ကောင်စီက ဂျက်ဖိုက်တာဖြင့် လာရောက်ဗုံးကြဲတိုက်ခိုက်မှုကြောင့် လသားကလေး အပါအဝင် ပြည်သူ(၃)ဦး သေဆုံးကြောင်း သိရသည်။
ဗုံးကြဲမှုကြောင့် ကွတ်ခိုင်မြို့ရှိ ရပ်ကွက်(၃)နှင့် ရပ်ကွက်(၄)အစပ်၊ မုံး၀န်းခန်းမကြီးနှင့် KK တည်းခိုခန်းလမ်းကြား တရုတ်နှစ်ခြင်းခရစ်ယာန်ဘုရားကျောင်း ဘေးမှာ ကျရောက်ပေါက်ကွဲတာ ဖြစ်ကြောင်း ဒေသခံသတင်းရင်းမြစ်ထံမှ သိရသည်။
” ည(၁၁း၄၀)နာရီခန့်မှာ တရုတ်နှစ်ခြင်းဘုရားကျောင်းဘေးမှာရှိတဲ့ လူနေအိမ်တွေပေါ် ဗုံးနဲ့လာကြဲသွားတာ၊ မိသားစု ၃ယောက် ဆုံးသွားတယ်၊ ဒဏ်ရာရတဲ့သူကတော့ ၆ ယောက်လောက်ရှိမယ်၊ အတိအကျတော့ မသိဘူး” လို့ ကွတ်ခိုင်ဒေသခံတစ်ဦးထံမှ သိရသည်။
မိတ္ထီလာ ရှမ်းတဲလေတပ်မှ MiG-29 Fighter Jet(၁)စီးသည် နိုဝင်ဘာလ(၁၇) ည(၁၁း၁၈)နာရီမှာ အရှေ့မြောက်အရပ်သို့ ပျံတက်သွားကြောင်း နိုင်ငံတလွှားလေကြောင်းကင်းထောက် NAS-နပ်စ် က ထုတ်ပြန်ထားပြီး မကြာခင် ကွတ်ခိုင်မှာ ဗုံးကြဲခံရတာဖြစ်ပါသည်။
