သျှမ်းပြည်နယ်တောင်ပိုင်း ပင်လုံမြို့နယ် စနင်းတောင်တန်းတစ်လျောက် မြေပြိုမှုနှင့် ရေကြီးမှု ဖြစ်ပေါ်ခဲ့ပြီး ယခုအချိန်တွင် ဖြတ်သန်းသွားလာခွင့် ယာယီပိတ်ထားသည်ဟု သိရသည်။ တောင်ကြီး-ဟိုပုံး-မိုင်းပွန်-လွိုင်လင်လမ်းပိုင်း၌လည်း မြေပြိုပြီး လမ်းပိတ်မှု မကြာခဏဖြစ်ပေါ်သောကြောင့် ယခုကာလအတွင်း ခရီးသွားလာရန် မသင့်သေးကြောင်း ဒေသတွင်း ခရီးသည်တင်ယာဉ်မောင်းများက ဆိုသည်။ လွိုင်လင်နှင့်မိုင်းပွန်ကြား ကားလမ်းပိတ်ဆို့နေချိန် တောင်ကြီး-ဟိုပုံး-ကျောက်တန်းကတဆင့် စနင်းတောင်ကျောအတိုင်း ပင်လုံသို့ သွားလာနိုင်သော်လည်း ယခုအခါ စနင်းတောင်ကျောတစ်လျောက် မြေပြိုမှုနှင့် ရေကြီးမှုကြောင့် သွားလာခွင့် ပိတ်ထားသည်ဟုသိရသည်။
“ဒီအချိန်မှာ ခရီးသွားမယ်ဆိုရင်တော့ ဟိုပုံး-မိုင်းပွန်-လွိုင်လင် လမ်းဆိုရင် တောင်ပြိုပြီးတော့လမ်းခဏခဏ ပိတ်တတ်လို့ ညအိပ်ရတတ်တယ်။ စနင်းတောင်ကျောဘက်သွားမယ်ဆိုရင်လည်း နမ့်ပွန်ချောင်းတံတားကိုတောင် ရေကျော်နေပြီ။ ပြီးတော့ စနင်းတောင်ပေါ်မှာလည်း လမ်းတွေပြို မြေတွေပြိုပြီး သွားလာလို့ မကောင်းဘူး။ အဲ့လမ်းတွေမှာ စောင့်နေတဲ့ အဖွဲ့အစည်းတွေကတော့ ခရီးမဆက်ဖို့ တားမြစ်ထားတယ်။”ဟု တောင်ကြီး-ပင်လုံ ခရီးသည်တင်ယာဉ်မောင်းတစ်ဦးက ဆိုသည်။ စနင်းတောင်ပေါ်တွင် PNO နှင့် SSPP အဖွဲ့တို့၏ စစ်ဆေးရေးဂိတ်များရှိသည်။
ဒါ့အပြင် စနင်းတောင်ပေါ်ရှိ ကျေးရွာများ၌လည်း မြေပြိုမှုကြောင့် လူနေအိမ်များ ပျက်စီးသလို ထိခိုက်သေဆုံးမှုများလည်းရှိသည်ဟု သိရသည်။ သို့သော် စနင်းတောင်ကျောပေါ်ကို သွားရောက်ကူညီရန် ခက်ခဲနေပြီး ဆက်သွယ်ရေးပြတ်တောက်နေသည်ဟု သိရသည်။
