NCA လက်မှတ်ရေးထိုးထားတဲ့ တိုင်းရင်းသားလက်နက်ကိုင်အဖွဲ့ ၇ ဖွဲ့ (7 EAO Alliance)နဲ့ အာဏာသိမ်း အစိုးရရဲ့ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC) တို့ ဇွန်လ ၉ ရက်နဲ့ ၁၀ ရက် (၂)ရက်သာအတွင်း နေပြည်တော်မှာ အလွတ်သဘော တွေ့ဆုံဆွေးနွေး ခဲ့တယ်လို့ သိရပါတယ်။
7 EAO Alliance ဘက်က ဆွေးနွေးညှိနှိုင်းရေးအဖွဲ့ အဖွဲ့ခေါင်းဆောင် ဗိုလ်မှူးကြီး စိုင်းငင်း ဦးဆောင်တဲ့ အဖွဲ့ဝင်(၈) ဦးပါဝင်ပြီး NSPNC ဘက်က ဒုတိယ ဗိုလ်ချုပ်ကြီး ရာပြည့် ဦးဆောင်တယ်လို့ သိရပါတယ်။
အလွတ်သဘော တွေ့ဆုံပွဲမှာ သျှမ်းပြည်ပြန်လည်ထူထောင်ရေးကောင်စီ (RCSS/SSA)မှ ဗိုလ်မှူးကြီး စိုင်းငင်း က အစိုးရသစ်ဖွဲ့စည်းပြီးတဲ့နောက် NSPNC က နိုင်ငံရေးပြဿနာကို နိုင်ငံရေးနည်းလမ်းနဲ့ ဖြေရှင်းဖို့၊ ငြိမ်းချမ်းရေး လုပ်ငန်းစဥ်များ အကောင်အထည်ဖော် ဆောင်ရွက်နိုင်ဖို့အတွက် လွတ်လပ်ပြီး ကြိုတင်ကန့်သတ်ချက် မထားတဲ့ ဆွေးနွေးပွဲများ ကျင်းပ
ပြုလုပ်နိုင်ဖို့အတွက် တရားဝင်ဖိတ်ခေါ်ခြင်းကို 7 EA အနေနဲ့ ကြိုဆိုကြောင်း ပြောပါတယ်။
ဒါ့အပြင် မိမိတို့ 7 EA အနေနဲ့လည်း သက်ဆိုင်ရာ တစ်ဖွဲ့ချင်းအတွင်းမှာ ဆွေးနွေးခဲ့သလို 7 EA ရဲ့ ဦးဆောင်အဖွဲ့မှာလည်း အကျေအလည် ဆွေးနွေးခဲ့ပြီး အစိုးရရဲ့ ငြိမ်းချမ်းရေး လုပ်ငန်းစဥ် ဆွေးနွေးဖို့ သဘောထား ချမှတ်နိုင်ခဲ့တယ်လို့ ဆိုပါတယ်။
ဆက်လက်ပြီး ငြိမ်းချမ်းရေး လုပ်ငန်းစဥ်ကို လက်ရှိ အခြေအနေများနဲ့အညီ ပြန်လည်ဖော်ဆောင်နိုင် ရေး၊ ငြိမ်းချမ်းရေး လုပ်ငန်းစဥ်မှာ ပါဝင်သင့်တဲ့ အဖွဲ့အစည်းများ ပါဝင်လာနိုင်စေရေး၊ ရေရှည်တည်တံ့ ခိုင်မြဲတဲ့ ငြိမ်းချမ်းရေး တည်ဆောက်နိုင်ရေးတို့ ရည်မှန်းထားတယ်လို့ ဗိုလ်ချုပ်ကြီး စိုင်းငင်း က ပြောပါတယ်။
နှစ်ရက်သာအတွင်း ကျင်းပပြုလုပ်တဲ့ အလွတ်သဘောတွေ့ဆုံဆွေးနွေးပွဲမှာ ဆွေးနွေးပွဲရဲ့ ရလဒ်ကောင်းတွေဖြစ်တဲ့ သဘောထားစုစည်းချက်များ၊ မှတ်တမ်းများ ရရှိအောင် နှစ်ဖက်ခေါင်းဆောင် ကိုယ်စားလှယ်များကို ကျေးဇူးတင်ပြီး ဒီအခင်းအကျင်းကို နှစ်ဦးနှစ်ဖက်က ပူးတွဲကျင်းပတဲ့ ဆွေးနွေးပွဲ ဖြစ်တယ်ဆိုတာ ပုံဖော်ပြသနိုင်ခဲ့သလို ဆွေးနွေးပွဲရဲ့ ပုံရိပ်ကောင်းတွေလည်း ဖော်ပြနိုင်ခဲ့တယ်လို့ 7 EAO Alliance က ယနေ့မှာ သတင်းထုတ်ပြန်ထားပါတယ်။
ရရှိလာတဲ့ ဆွေးနွေးပွဲ ရလဒ်တွေကို 7 EAO Alliance ရဲ့ ဦးဆောင်အဖွဲ့အစည်းအဝေးမှာ အစီရင်ခံတင်ပြသွား မှာဖြစ်ပြီး အစည်းအဝေးရဲ့ လမ်းညွန်ချက်တွေ၊ ဆုံးဖြတ်ချက်တွေနဲ့အညီ ငြိမ်းချမ်းရေးဆိုင်ရာ လုပ်ငန်းစဥ်တွေကို လိုအပ်သလို ဆက်လက်ဆောင်ရွက်သွားမယ်လို့ ဆိုပါတယ်။
7 EAO Alliance ရဲ့ ငြိမ်းချမ်းရေးလုပ်ငန်းစဥ် ဖော်ဆောင်ရေး ရည်မှန်းချက် (၃)နဲ့အညီ သက်ဆိုင်ရာ အဖွဲ့အစည်းများအားလုံးနဲ့ ညှိနှိုင်းဆွေးနွေး ဆောင်ရွက်သွားမယ်လို့ ထုတ်ပြန်ထားပါတယ်။
7 EAO Alliance အဖွဲ့မှာ သျှမ်းပြည်ပြန်လည်ထူထောင်ရေးကောင်စီ(RCSS)၊ မွန်ပြည်သစ်ပါတီ (NMSP)၊ ဒီမိုကရေစီအကျိုးပြု ကရင့်တပ်မတော်(DKBA)၊ ကရင်အမျိုးသားအစည်းအရုံး/ ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ(KNU/KNLA-PC)၊ ပအိုဝ်း အမျိုးသား လွတ်မြောက်ရေးအဖွဲ့ချုပ်(PNLO)၊ ရခိုင်ပြည်လွတ်မြောက်ရေးပါတီ(ALP)နဲ့ လားဟူ ဒီမိုကရက်တစ် အစည်းအရုံး(LDU)တို့ ပါဝင်ပါတယ်။
Photo – 7 EAO Alliance