ယခုနှစ် တောင်ကြီးမြို့ တန်ဆောင်တိုင်ပွဲတော်ကို လာမယ့် နိုဝင်ဘာလ ၁၈ ရက်နေ့မှ ၂၄ ရက်နေ့အထိ တောင်ကြီးမြို့ရှိ အဝေရာမီးပုံးပျံကွင်းမှာ စည်ကားသိုက်မြိုက်စွာ ကျင်းပသွားမယ်လို့ ရှမ်းပြည်နယ် ရိုးရာမီးပုံးပျံပညာရှင်များအသင်းထံမှ သိရပါတယ်။
တောင်ကြီးတန်ဆောင်တိုင်ပွဲတော်ကို ယခင်နှစ်များအတိုင်း ပြိုင်ပွဲတွေ ထည့်သွင်းကျင်းပသွားမှာဖြစ်ပြီး ညလွှတ်မီးပုံးပျံ ဖြစ်တဲ့ ညမီးကြီး၊ စိန်နားပန် နဲ့ နေ့လွှတ်အရုပ်တွေဖြစ်တဲ့ ခြေ ၂ ချောင်း၊ ခြေ ၄ ချောင်း အုပ်စုမီးပုံးပျံ စာရင်းတွေကိုတော့ ယနေ့ စက်တင်ဘာ ၁၇ ရက်မှ ၂၇ ရက်နေ့အထိ စာရင်းပေးသွင်းနိုင်တယ်လို့ သိရပါတယ်။
မီးပုံးပျံပြိုင်ပွဲဝင်အသင်းတွေကို သျှမ်းအစိုးရအဖွဲ့က ယမ်းပစ္စည်းနဲ့ နေ့လွှတ်အရုပ်အတွက် ငွေကျပ် ၅ သောင်း ထောက်ပံ့ပေးမယ်လို့လည်း မီးပုံးပျံအဖွဲ့ထံမှ သိရပါတယ်။
ယမန်နှစ် တောင်ကြီးတန်ဆောင်တိုင် မီးပုံးပျံပြိုင်ပွဲမှာ ပြိုင်ပွဲဝင် ညမီးကြီး မီးပုံးပျံ ၄၃ လုံးနဲ့ စိန်နားပန် မီးပုံးပျံ ၃၈ လုံး စုစုပေါင်း ၈၁ လုံး ဝင်ရောက်ယှဥ်ပြိုင်ခဲ့ပြီး ယခုနှစ် မီးပုံးပျံ အရေအတွက်ဟာ ယခင်နှစ်ထက် ပိုများလာနိုင်တယ်လို့ သိရပါတယ်။
Photo – Internet