၂၀၀၈ ခုနှစ် ဖွဲ့စည်းပုံအခြေခံဥပဒေကို လေးစားလိုက်နာကာ ပြည်ထောင်စုကနေ ခွဲထွက်မှာ မဟုတ်ဘဲ ဆွေးနွေးညှိနှိုင်းမှု မူဘောင်အတွင်းကနေ ဆောင်ရွက်သွားမယ်လို့ “ဝ”ပြည်သွေးစည်းညီညွတ်ရေးပါတီ(UWSP) ဒုတိယ ဥက္ကဋ္ဌ ဦးကျောက်ကော်အန်း က ပြောပါတယ်။
နိုဝင်ဘာလ ၃ ရက်နေ့က သျှမ်းမြောက် ပန်ဆန်းမြို့မှာ စစ်ကောင်စီရဲ့ အမျိုးသားစည်းလုံး ညီညွှတ်ရေး နှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ NSPNC နဲ့ “ဝ”ပြည်သွေးစည်းညီညွှတ်ရေးပါတီ UWSP တို့ တွေ့ဆုံချိန်မှာ ဦးကျောက်ကော်အန်း က အထက်ပါအတိုင်း ပြောကြားခဲ့တာပါ။
“ဝ”ဒေသဟာ ပြည်ထောင်စုကနေ ခွဲမထွက်ဘဲ ၂၀၀၈ ဖွဲ့စည်းပုံအခြေခံဥပဒေကို လိုက်နာဆောင်ရွက် မယ်ဆိုတာ သိရတဲ့အတွက် ဝမ်းသာတယ်လို့ NSPNC ဥက္ကဋ္ဌ ဒုတိယဗိုလ်ချုပ်ကြီး ရာပြည့် ကပြောပါတယ်။
နှစ်ဖက်အဖွဲ့တွေ့ဆုံရာမှာ အွန်လိုင်းလောင်းကစားနဲ့ မူးယစ်ဆေးဝါးတိုက်ဖျက်ရေးဆိုင်ရာ ကိစ္စရပ်တွေ၊ ပညာရေး၊ ကျန်းမာရေး၊ လမ်းပန်းဆက်သွယ်ရေးနဲ့ ဒေသတည်ငြိမ်အေးချမ်းရေးနှင့် ကုန်စည်စီးဆင်းမှု မြန်ဆန်နိုင်စေရေးဆိုင်ရာ ကိစ္စရပ်တွေ အဓိကထား ဆွေးနွေးခဲ့ကြတယ်လို့ “ဝ” ဘက်ရော စစ်ကောင်စီ ဘက်ကပါ သတင်းထုတ်ပြန်ထားပါတယ်။
NSPNC နဲ့ UWSP ကိုယ်စားလှယ်တို့ ပန်ဆန်းမြို့ တွေ့ဆုံမှုမှာ ဒုတိယအကြိမ်မြောက်ဖြစ်ပြီး နေပြည်တော် မှာလည်း တစ်ကြိမ်တွေ့ဆုံဆွေးနွေးခဲ့ပါတယ်။
ဒီတွေ့ဆုံမှုဟာ ပုံမှန်ဆွေးနွေးနေကြ အခြေအနေတွေသာဖြစ်တယ်လို့ “ဝ”တပ် UWSA ပြောခွင့်ရ ဦးညီရန်း က Wa News Land မှာ ပြောဆိုထားပါတယ်။
Photo – WSTV