သျှမ်းပြည်နယ်တောင်ပိုင်း အောင်ပန်းမြို့ မင်္ဂလာရပ်ကွက်တွင် မေလ(၁၃)ရက်နေ့ ညနေ(၂)နာရီခန့်က ရိုးရာမီးလုံးပွဲတွင် လွှတ်တင်ယှဉ်ပြိုင်မယ့် မီးလုံးယမ်းထောင်းရာမှတဆင့် ပေါက်ကွဲမှုဖြစ်ပွားခဲ့သည်။ ပေါက်ကွဲမှုကြောင့် မီးလုံးယမ်းမှုန့်ပြုလုပ်သည့် အိမ်မီးလောင်ကျွမ်းခဲ့ပြီး အမျိုးသား(၃)ဦးလည်း ထိခိုက်ဒဏ်ရာပြင်းထန်စွာ ရရှိခဲ့သည်။
“မိုးရာသီရောက်တော့မယ်ဆိုတော့ သျှမ်းပြည်နယ်တောင်ပိုင်းမှာ ရိုးရာမိုးလုံးပွဲ(မီးရှူးပွဲ)ကို မိုးခေါ်ပွဲဆိုပြီး လွှတ်တင်ယှဉ်ပြိုင်ကြတာပေါ့။ တောင်ပိုင်းမှာတော့ မီးပုံးပျံပွဲအပြင် ဒီမီးရှူးလွှတ်တင်ပွဲကလည်း လူတွေစိတ်ဝင်စားတဲ့ ပွဲတစ်ခုဖြစ်တာပေါ့။ မီးလုံးထဲမှာ ယမ်းအပြည့်ထည့်ပြီး လွှတ်တင်ရတာဆိုတော့ တစ်ခါတစ်လေ ယမ်းမှုန့်လုပ်တဲ့အချိန်မှာ မတော်တဆဖြစ်ပြီး ပေါက်ကွဲတာတွေဖြစ်တတ်တယ်။ သတိထားရတာပေါ့။” ဟု ဟိုပုံးမြို့နယ်က မီးလုံး(မီးရှူး)ယမ်းမှုန့် ပြုလုပ်သူတစ်ဦးက ပြောပြသည်။
အဆိုပါ မတော်တဆမှုကြောင့် အမျိုးသား(၃)ဦးတွင် (၂)ဦးသည် တစ်ကိုယ်လုံးမီးလောင်ဒဏ်ရာရရှိခဲ့ပြီး ကျန်တစ်ဦးကတော့ ခြေထောက်တွင် မီးလောင်ဒဏ်ရာရရှိခဲ့သည်ဟုဆိုသည်။ ရိုးရာမီးလုံးလွှတ်တင်ပွဲကို သျှမ်းပြည်နယ်တောင်ပိုင်း အောင်ပန်း၊ ကလော၊ ဟဲဟိုး၊ ဟိုပုံး၊ ကျောက်တစ်လုံးကြီး စသည့်မြို့နယ်များ၌ ကျင်းပပြုလုပ်လေ့ရှိသည်။
