အထူးဒေသ ၄ နဲ့ သင့်လျော်တဲ့ နိုင်ငံရေးနှင့် အုပ်ချုပ်ရေးဆိုင်ရာ အဆင့် အတန်း သတ်မှတ်ပေးရေးနဲ့ မိုင်းလားမှာ ရွေးကောက်ပွဲကျင်းပနိုင်ရေး အပါ အဝင် ဒေသဖွံ့ဖြိုးရေးဆိုင်ရာ ကိစ္စရပ်တွေကို စစ်ကောင်စီရဲ့ NSPNC နဲ့ NDAA တို့က မိုင်းလားမှာ နှစ်ဖက်အပြန်အလှန် တွေ့ဆုံဆွေးနွေးခဲ့ကြတယ်လို့ သိရပါတယ်။
လက်ရှိကာကွယ်ရေးဝန်ကြီးလည်းဖြစ်တဲ့ အမျိုးသားစည်းလုံးညီညွှတ်ရေးနှင့် ငြိမ်းချမ်းရေးဖော် ဆောင်မှု ညှိနှိုင်းရေးကော်မတီ (NSPNC) ဥက္ကဋ္ဌ ဒုတိယဗိုလ်ချုပ်ကြီး ရာပြည့် ဦးဆောင်တဲ့ ကိုယ်စား လှယ် အဖွဲ့ဟာ နိုဝင်ဘာလ ၁ ရက်က မိုင်းလားသို့ သွားရောက်ပြီး အမျိုးသားဒီမိုကရက်တစ် မဟာမိတ်အဖွဲ့ (NDAA) ဥက္ကဋ္ဌ ဦးထိန်လင်း နဲ့ တွေ့ဆုံဆွေးနွေးခဲ့တာဖြစ်ပါတယ်။
အထူးဒေသ ၄ ဟာ နိုင်ငံတော်ရဲ့ အစိတ်အပိုင်းတစ်ခုဖြစ်ပြီး ဒေသခံပြည်သူများလည်း မြန်မာနိုင်ငံသားများဖြစ်ကာ အထူးဒေသ ၄ ရဲ့ နိုင်ငံရေးလိုလားချက်အပေါ် ၂၀၀၈ ဖွဲ့စည်းပုံအခြေခံဥပဒေနဲ့အညီ ဆက်လက် ညှိနှိုင်းဆောင်ရွက်ရမှာဖြစ်ပြီး ၂၀၂၇ ခုနှစ် ကြားဖြတ်ရွေးကောက်ပွဲ ကျင်းပနိုင်ဖို့ လိုအပ်တဲ့ ကိစ္စတွေလည်း ညှိနှိုင်းဆောင်ရွက်ရမယ်လို့ ဒုတိယဗိုလ်ချုပ်ကြီး ရာပြည့် ကပြောပါတယ်။
NDAA ဥက္ကဋ္ဌ ဦးထိန်လင်း ကတော့ ငြိမ်းချမ်းစွာ ညှိနှိုင်းဆွေးနွေးခြင်းမှ တစ်ဆင့် နိုင်ငံရေး အဆင့်အတန်းကို ဖော်ထုတ်ဆွေးနွေးသွားမယ်လို့ ပြောတဲ့အကြောင်း စစ်ကောင်စီဘက်က ထုတ်ပြန်ထားပါတယ်။
ဒီတွေ့ဆုံမှုနဲ့ ပတ်သက်ပြီး NDAA ဘက်က ယနေ့နံနက်ပိုင်းချိန်အထိ သတင်းထုတ်ပြန်ထားတာ မရှိသေးပါဘူး။
ဒုတိယဗိုလ်ချုပ်ကြီး ရာပြည့် အနေနဲ့ ယခုနှစ်အတွင်းမှာ မိုင်းလားကို သွားရောက်ပြီး NDAA နဲ့ တွေ့ဆုံတာဟာ ဒုတိယအကြိမ်မြောက်ဖြစ်ပြီး ပြီးခဲ့တဲ့ သြဂုတ်လအတွင်းကလည်း နေပြည်တော်မှာ ငြိမ်းချမ်းရေးတွေ့ဆုံဆွေးနွေးခဲ့ကြတယ်လို့ သိရပါတယ်။