သျှမ်းပြည် တောင်ပိုင်းညောင်ရွှေမြို့နယ် အင်းလေးကန်အရှေ့ဖက်ခြမ်း နှင့် အနောက်ဖက်ခြမ်းတို့တွင် ယခုရက်ပိုင်းအတွင်း ဗုံးပေါက်ကွဲမှု နှစ်ကြိမ်ဖြစ်ပွားခဲ့ကြောင်း ဒေသခံများထံမှ သိရသည်။
အောက်တိုဘာ ၁၅ ရက် ည ၇ နာရီအချိန်ခန့်က ညောင်ရွှေမြို့နယ် အင်းလေးကန်အရှေ့ဖက် တောင် ခြေ မြင်းစခွန့် ကျေးရွာအုပ်စု ၊ ဝါးတောရွာနင့် ရွှေလှဖုန်းရွာကြားရှိ ဖုန်းတိုင်တတိုင်အနီး ဗုံးပေါက်ကွဲမှုဖြစ်ပွားခဲ့ပြီး အောက်တိုဘာ ၁၂ ရက်ကလည်း အင်းလေးဒေသ လင်းကင်းကျေးရွာအုပ်စု၊ ကံရွာရှိ လောင်းကစားဝိုင်းအနီးဗုံးပေါက် ကွဲမှုဖြစ်ပွား
ခဲ့သေးကြောင်း သိရသည်။
“ လင်းကင်းမှာ ပေါက်ကွဲတုန်းကတော့ နေအိမ်နံရံပါ ပြိုတယ် ၊ ပေါက်ကွဲသံလဲအကျယ်ကြီးပဲ ဟူပင်ဟိုတယ်က ဧည့်သည်တွေတောင် နောက်နေ့ထွက် ပြေးရတယ်” ဟု ခေါင်တိုင်ဒေသခံတစ်ဦးကပြောသည်။
လက်ရှိတွင် အင်းလေးဒေသ၌ စစ်ကောင်စီ ဦးဆောင်၍ အင်းလေးဖောင်တော်ဦးဘုရားပွဲကျင်းနေချိန်ဖြစ်ပြီး အင်းလေးတော်လှန်ရေးအင်အားစုများကအဆိုပါဘုရားပွဲအား တစ်နိုင်ငံလုံး လူသတ်မီးရှို့ဘာသာရေးအဆောက်အအုံများ ဖျက်ဆီးနေသည့်ကြားမှ စစ်ကောင်စီ ဖိအားပေးကျင်းပသည့် ပွဲကို မပါဝင်ကြရန် လှံ့ဆော်မှုများရှိနေကြောင်း သိရသည်။
၄င်းပေါက်ကွဲမှုများတွင် လူထိခိုက်မှုမရှိသော်လည်း စစ်ကောင်စီက မသင်္ကာ၍ ဖမ်းဆီးသွားသည့် ရွာ သားများလည်းရှိကြောင်း သိရသည်။
“ ပေါက်ကွဲမှုဖြစ်ရင် စစ်တပ်က ရမ်းသန်းဖမ်းနေကြလေ သပြေပင်ရွာသားတွေပါသွားတယ် မိသားစုဝင်တွေနဲ့ ရွာသူကြီးက လိုက်ထုတ်တော့မှ ပြန်လွတ်လာတယ်လို့ သိရတယ်” ဟု ၄င်း ဒေသခံက ဆိုသည်။
ပေါက်ကွဲမှုနှင့်ပတ်သက်၍ မည်သည့်အဖွဲ့အစည်းက ပြုလုပ်သည်ကို HsanLoiVoice မှ အတည်မပြုနိုင်သေးပေ။
Photo- အင်းလေးဒေသ ပုံဟောင်း