၂၀၂၄ ခုနှစ် ဧပြီလ(၂၇)ရက်နေ့က သျှမ်းနီတိုင်းရင်းသားလူငယ်ခေါင်းဆောင် စိုင်းအုန်းလွင်၏ ဟုမ္မလင်းမြို့နယ်၊ နားမော်ကျေးရွာရှိ နေအိမ်အား ခန္တီးခရိုင် PDF က ချိတ်ပိတ်သွားခဲ့ကြောင်း သိရသည်။ ချိတ်ပိတ်သွားသော အဖွဲ့သည် NUG လက်အောက်ခံ၊ ခန္တီးခရိုင်တပ်ရင်းဖြစ်သော HPDF-124 က ဖြစ်သည်။
ဒါ့အပြင် စိုင်းအုန်းလွင်၏ နေအိမ်ကိုလည်း အဆိုပါဒေသကာကွယ်ရေးအဖွဲ့(PDF)က ဝင်ရောက်မွှေနှောက်ခဲ့ပြီး ဖျက်ဆီးမှုပြုခဲ့သည်ဟု Shanni Nationalities Unity Association က ဖော်ပြသည်။ အိမ်ဝိုင်းအတွင်းကိုလည်း မိုင်းထောင်ထားခဲ့ရာ စိုင်းအုန်းလွင်၏ အကိုဖြစ်သူက အိမ်ပျက်စီးမှုအခြေအနေပြန်ကြည့်စဉ် ဗုံးပေါက်ကွဲမှုကြောင့် ထိခိုက်ဒဏ်ရာရရှိခဲ့သည်ဟု သိရသည်။
ယခင်ကလည်း သျှမ်းနီဒေသအတွင်း ဒေသခံကာကွယ်ရေးအဖွဲ့များ ပဋိပက္ခများဖြစ်ပေါ်ခဲ့ဖူးသလို သျှမ်းနီတိုင်းရင်းသားများ၏ သျှမ်းအိုးစည်များအား မီးရှို့ဖျက်ဆီးခြင်း၊ သျှမ်းနီသံဃာတော်များအား ဖမ်းဆီးခေါ်ဆောင်သွားခြင်း၊ ဒေသခံ သျှမ်းနီလူငယ်များအား ဖမ်းဆီးခေါ်ဆောင်သွားခြင်းများ ဖြစ်ပေါ်ခဲ့ဖူးသည်။