သျှမ်းပြည်မြောက်ပိုင်းက လက်ရှိဖြစ်ပွားနေတဲ့တိုက်ပွဲတွေကြောင့် သျှမ်းပြည်တောင်ပိုင်းကို တက်လာကြတဲ့ စစ်ရှောင်ပြည်သူတွေ နမ့်စန်စစ်ဆေးရေးဂိတ်နဲ့ ဟိုပုံး-တောင်ကြီးတိုးဂိတ်အနီးက စစ်ဆေး ရေးဂိတ်တွေမှာ ထောင်နဲ့ချီရောက်ရှိနေကြတယ်လို့ စုံစမ်း သိရပါတယ်။
“ သျှမ်းမြောက်က စစ်ဘေးရှောင်တွေပါ ခန့်မှန်း လူ (1000) ကျော်လောက်ရှိတယ်၊ ၁၂ ဘီးကားတွေနဲ့ ရောက်လာကြတာဖြစ်ပြီး နောက်ထပ်လည်း လူအများကြီး ရောက်လာဖို့ရှိနေပါတယ်။ သူတို့တွေ ထမင်းမစားရတာ ၂ ရက်လောက် ရှိပါပြီ။ လူတော်တော်များများက ငွေလဲ မပါကြပါဘူး။အဲ့ဒီဂိတ်အနီးနားမှာ ဝယ်စားစရာ ဆိုင်လည်းမရှိပါဘူး ၊ ဒေသခံတစ်ချို့ကသတင်းရပြီး ထမင်းဘူးတွေလာ ဝေပေးတာတွေ ၊ ရေဘူး/ ပေါင်မုန့်နဲ့ ဆေးဝါးအချို့ အရေးပေါ် လှူခဲ့တာတွေတော့ရှိပါတယ် ဒါပေမဲ့ မလောက်ငှပါဘူး ” လို့ စစ်ရှောင်တွေကို ကူညီနေသူတစ်ဦးကပြောပါတယ်။
အဲ့ဒီ ထောင်နဲ့ချီတဲ့ စစ်ရှောင်တွေဟာတောင်ကြီး မြို့ကို ဖြတ်သန်းသွားလာခွင့် ခွင့်ပြုမိန့် အတွက် စစ်ဆေးရေးဂိတ်အနီးက ကွင်းပြင်မှာပဲ စောင့်စိုင်းနေကြရတာဖြစ်ပြီး ခွင့်ပြုမိန့်ရဖို့ ဘယ်နှစ်ရက်ကြာမယ်မှန်း မသိရသေးပဲ အထက်က သွားခွင့်ပြုတာနဲ့ ခရီးဆက်ကြမှာဖြစ်တယ် လို့သိရပါတယ်။
“ တစ်ချို့က ကားသာလိုက်စီးပြီး ထွက်လာရတာ။ ဘယ်အရပ် ဘယ်ဌာနေကို သွားရမှန်း မသိကြတဲ့သူတွေ ဒုနဲ့ ဒေးပါပဲ ၊ တစ်ချို့ကလည်း ဆွေမျိုး/ အသိမိတ်ဆွေရှိရာ နတ်မောက်၊ သာစည် နဲ့ တစ်ခြားမြို့တွေကို သွားကြမယ့်သူတွေရှိတယ် သူတို့အလိုရှိရာအရပ်ကို ဦးတည်သွားကြမှာပါ” လို့ဆိုပါတယ်။
သျှမ်းတောင်နမ့်စန် စစ်ဆေးရေးဂိတ်မှာလဲ စစ်ဆေးမှုတွေကြောင့် ပိတ်မိနေသူတွေ ရာနဲ့ချီရှိနေပြီး နမ့်စမ်ဂိတ်ကျော်ပြီး နောက်ရက်တွေဆို ဟိုပုံးဂိတ်မှာ ထပ်ရောက်လာကြဦးမှာဖြစ်တယ်လို့ဆိုပါတယ်။
“ နောက်ထပ် ၁၂ ဘီးကား ၅ စီးထပ်ဝင်ဖို့ရှိပါတယ်။
နမ့်စမ်ဂိတ်မှာ ဖြတ်လာမယ့် ကားတွေ ကျန်နေပါသေးတယ်။ နမ့်စမ်ဂိတ်မှာ ဖြတ်ခွင့်မရပဲ ကျန်နေတာတွေ အများမှအများကြီးရှိပါသေးတယ် ၊ရာသီဥတုက ည ၇ နာရီဆို အိမ်ထဲနေရတဲ့သူတွေတောင် အရမ်းအေးလာနေပါပြီ။ ကွင်းပြင်ထဲနေနေရရှာတဲ့ ၊ သူတို့တတွေဘယ်လောက်တောင် ခိုက်ခိုက်တုန် ချမ်းအေးပြီး ဆာလောင်မွတ်သိပ်နေရှာ လိမ့်မလဲ ဒါကြောင့်အရေးပေါ်ကူညီမှုတွေအများကြီးလိုအပ်နေပါတယ် ” လို့ စစ်ရှောင်တွေကို ကူညီနေသူကပြောပါတယ်။
စစ်ရှောင်တွေအတွက် အရေးပေါ်လိုအပ်ချက်မှာ စားသောက်စရာနဲ့ ရေ ဖြစ်ပြီး ဆေးဝါး၊ အမျိုးသမီးအသုံးအဆောင်ပစ္စည်း၊ စောင်၊ အနွေးထည်များ လည်းလိုအပ်နေတာဖြစ်တဲ့အတွက် လာရောက်လှူဒါန်းကြဖို့ စစ်ရှောင်အရေးကူညီပေးနေသူတွေက တောင်းဆိုထားပါတယ်။
