သျှမ်းပြည်မြောက်ပိုင်း၊ သိန္နီမြို့နယ်ရှိ မိုင်းပါးကျေးရွာအုပ်စု ရွာဝင်ဆိုင်းဘုတ်ကို ကိုးကန့်တပ် MNDAA က မနေ့က လာရောက်ဖျက်ဆီးသွားခဲ့တယ်လို့ ဒေသခံသတင်းရင်းမြစ်ထံမှ သိရပါတယ်။
သိန္နီမြို့နယ်ကို ထိန်းချုပ်ထားတဲ့ ကိုးကန့်တပ် MNDAA က မိုင်းပါးအုပ်စုရှိ သျှမ်းရွာရဲ့ ရွာအဝင်မှာ သျှမ်းစာနဲ့ မြန်မာစာ ရေးထိုးထားတဲ့ ဆိုင်းဘုတ်ကို ဒေသခံပြည်သူလူထုရဲ့ သဘောထား ဆန္ဒ မေးမြန်းခြင်းမရှိဘဲ လာရောက်ဖျက်ဆီးသွားခဲ့တာလို့ သိရပါတယ်။
အခုလို MNDAA ရဲ့ လုပ်ရပ်ဟာ အတူနေတိုင်းရင်းသားများရဲ့ အမှတ်သညာ၊ စာပေ ယဥ်ကျေးမှုတွေကို လေးစားမှုမရှိဘဲ မထီမဲ့မြင် ဖျက်ဆီးနေတာပဲဖြစ်တယ်လို့ သိန္နီဒေသခံကတစ်ဦးကပြောပါတယ်။
ဆိုရှယ်မီဒီယာမှာ ပြန့်နှံ့လာတဲ့ပုံအရ မူလဆိုင်းဘုတ်ကို ဖျက်ဆီးပြီး သုံးဖက်မြင် တြိဂံပုံ ပြန်လည်တည်ဆောက်ထားတာကို တွေ့ရပြီး မိုင်းပါးကျေးရွာ အုပ်စုအစား မိုင်းပါးမြို့နယ်အဖြစ် ပြန်လည်ရေးထိုးမှာဖြစ်သလို တရုတ်စာ၊ သျှမ်းစာ နဲ့ မြန်မာစာ ပါ ထည့်သွင်းရေးထိုးသွားမယ်လို့ နောက်ထပ်သတင်းရင်းမြစ်ထံမှ သိရပါတယ်။
မိုင်းပါးကျေးရွာ အဝင်ဆိုင်းဘုတ်နဲ့ ပတ်သက်ပြီး ကိုးကန့်တပ်ဖွဲ့ သတင်းနှင့် ပြန်ကြားရေးဌာနမှ တာဝန်ရှိသူကို Hsan Loi Voice အနေနဲ့ ဆက်သွယ်မေးမြန်းဖို့ ကြိုးစားပေမယ့် ဆက်သွယ်လို့ မရပါဘူး။
ပြီးခဲ့တဲ့ ဧပြီလအတွင်းကလည်း ကွတ်ခိုင်မြို့နယ်အတွင်းရှိ ရွာအဝင် ဆိုင်းဘုတ် တွေမှာ သက်ဆိုင်ရာ တိုင်းရင်းသားလူမျိုးစုတွေရဲ့ စာပေနဲ့ ရေးထိုးထားတာကို ကိုးကန့်တပ်က လာရောက်ဖျက်ဆီးသွားပြီး တရုတ်စာဖြင့် အစားထိုး ပြောင်းလဲရေးသားနေတဲ့ ဖြစ်စဥ်ဖြစ်ခဲ့တယ်လို့ သိရပါတယ်။
Photo – credit to owner