သျှမ်းပြည်နယ်မြောက်ပိုင်း ကွတ်ခိုင်မြို့နယ်အတွင်းရှိ မိုင်းယုလမ်းခွဲဆိုင်းဘုတ်အား ယခင်ကတည်းက သျှမ်းစာ မြန်မာစာများဖြင့် ရေးထားသလို သျှမ်းပြည်နယ်အလံကိုလည်း ဆိုင်းဘုတ်တွင် ထည့်သွင်းဖော်ပြထားသည်။ ယခုအခါ အဆိုပါ လမ်းခွဲဆိုင်းဘုတ်အား TNLA က ဖျက်ဆီးပြီး တအာင်းပလောင်အလံဖြင့် အစားလိုက်ကြောင်း သိရသည်။
သျှမ်းပြည်နယ်မြောက်ပိုင်း ကွတ်ခိုင်မြို့အတွင်းဆက်ဆံရေးရုံးဖွင့်လှစ်ထားသော KIA ရုံးကိုလည်း TNLA က ဖိအားပေးဖယ်ရှားခိုင်းခဲ့ဖူးသည်။ ဒါ့အပြင် စစ်ဆင်ရေး (၁၀၂၇) မတိုင်မီကတည်းက သျှမ်းပြည်နယ်မြောက်ပိုင်းရှိ ကျေးရွာဝင်ဆိုင်းဘုတ်များအား TNLA က ဖျက်ဆီးပြီး ယခုလို ပြုလုပ်ခဲ့ဖူးသည်။
ကွတ်ခိုင်မြို့တွင် သျှမ်း၊ ကချင်၊ တအာင်း၊ တရုတ်၊ ဗမာနှင့် အခြားတိုင်းရင်းသားလူမျိုးပေါင်းများစွာ စုပေါင်းနေထိုင်သော မြို့ဖြစ်ပြီး SSPP/SSA၊ KIA၊ MNDAA နှင့် TNLA စသည့် တိုင်းရင်းသားလက်နက်ကိုင်အဖွဲ့များ လှုပ်ရှားသွားလာသော ဒေသဖြစ်သည်။
