မိုးအဆက်မပြတ်ရွာသွန်းမှုကြောင့် သျှမ်းပြည်နယ်တောင်ပိုင်း လွိုင်လင်မြို့နယ် ခေါင်းနွဲ့ရွာတွင် စက်တင်ဘာ ၉ ရက်နေ့မှ ၁၃ ရက်နေ့အထိ မြေပြိုမှုဖြစ်ပွားခဲ့ပြီး ဒေသခံအများအပြား မြေပြိုမှုကြောင့် အသက်ဆုံးရှုံးခဲ့ရကြောင်း သိရသည်။ မြေပြိုမှုကြောင့် ဒေသခံရွာသူရွာသား (၂၈) ဦး ရေထဲမြောပါသွားသေဆုံးခဲ့ရသည်ဟု သိရှိရပြီး ယနေ့အထိ (၂၁)ဦး၏ အလောင်းကိုသာ ပြန်လည်ရှာဖွေတွေ့ရှိထားသည်။
“ခေါင်းနွဲ့ရွာက မိုင်းပွန်နဲ့လွိုင်လင် ကားလမ်းကြီးဘေးမှာ ရှိတဲ့ ရွာတစ်ရွာဖြစ်ပါတယ်။ စက်တင်ဘာလ (၁၁)ရက်နေ့လောက်ကစပြီး အုပ်ချုပ်ရေးမှူးအိမ်နဲ့ ရွာထဲက ၃ အိမ်လောက် မြေပြိုကျတဲ့အထိပါသွားတယ်။ အဲ့ကနေ တစ်ဖြည်းဖြည်းဆက်တိုက်မြေပြိုကျပြီးတော့ ရွာသူရွာသား (၂၈)ဦး ရေထဲပါသွားတယ်။ ရွာမှာက ဖုန်းလိုင်းလည်းမမိတော့ ဆက်သွယ်ရေးပြတ်တောက်နေပြီးတော့ တောထဲရှာဖွေဖို့လည်းခက်ခဲနေတယ်။”ဟု တောင်ကြီးမြို့ လူမှုကူညီရေးအဖွဲ့ဝင်တစ်ဦးက ပြောပြသည်။
ခေါင်းနွဲ့ရွာမြေပြိုမှုတွင် ကုန်တင်ကား (၅)စီးခန့်လည်း ရေစီးထဲမြောပါသွားခဲ့ရပြီး လမ်းပိတ်ဆို့မှုလည်း ဖြစ်ပေါ်ခဲ့သည်။ မိုးအဆက်မပြတ်ရွာသွန်းပြီး ရေကြီးရေလျှံမှုကြောင့် သျှမ်းပြည်နယ်တောင်ပိုင်းတွင် လူ (၁၄၀)ဦးကျော် အသက်ဆုံးရှုံးခဲ့ရကြောင်း သတင်းရရှိသည်။
