သျှမ်းပြည်တောင်ပိုင်း၊ နမ့်စန်မြို့နယ်၊ ပေါ်ကျွဲကျေးရွာအနီးမှာ အွန်လိုင်းလိမ်လည် လောင်းကစားမှု လုပ်ကိုင်သူ ထိုင်းနိုင်ငံသား ၁၈ ဦးအား လုပ်ငန်းသုံးပစ္စည်းနဲ့အတူ ဖမ်းဆီးရမိခဲ့တယ်လို့ စစ်အုပ်စုက ထုတ်ပြန်ထားပါတယ်။
ယမန်နေ့ အောက်တိုဘာ ၃၀ ရက် နံနက် ၁၀ နာရီကျော်က လုံခြုံရေးတပ်ဖွဲ့တွေ ပါဝင်တဲ့ ပူးပေါင်းအဖွဲ့တွေဟာ နမ့်စန်မြို့နယ် ပေါ်ကျွဲကျေးရွာရဲ့ အနောက်မြောက်ဘက် မီတာ ၁၇၀၀ ခန့် အကွာ မှာ အွန်လိုင်းလိမ်လည် လောင်းကစားမှု လုပ်ငန်းများလုပ်ကိုင်နေတဲ့ တရားမဝင် ထိုင်းနိုင်ငံသား အမျိုးသား ၁၂ ဦး နဲ့ အမျိုးသမီး ၆ ဦး စုစုပေါင်း ၁၈ ဦးတို့ကို ဖမ်းဆီးရမတယ်လို့ ဆိုပါတယ်။
ဒါ့အပြင် အွန်လိုင်းလိမ်လည်လုပ်ငန်းမှာ အသုံးပြုတဲ့ ယာယီလူနေတဲ ၃ လုံး၊ ယာယီအလုပ်ရုံတဲ ၁ လုံး၊ ယာယီစားချက်ဆောင် ၁ လုံး၊ Star Link ၂ လုံး၊ ALL In One Computer ၇ လုံး၊ Color Printer ၁ လုံး၊ ဖုန်းမျိုးစုံ ၁၆ လုံး၊ CPU ၂ လုံးနဲ့ ဆက်စပ်ပစ္စည်းတွေ ဖမ်းဆီးရမိခဲ့တယ်လို့ ဖော်ပြထားပါတယ်။
ဖမ်းဆီးရမိသူတွေကို လိုအပ်တဲ့ စစ်ဆေးမှုများ ဆောင်ရွက်ပြီးပါက တည်ဆဲဥပဒေနဲ့အညီ ပြင်းထန်စွာ အရေးယူသွားမှာဖြစ်ပြီး သိမ်းဆည်းရမိတဲ့ လုပ်ငန်းသုံးပစ္စည်းတွေကို လုပ်ထုံးလုပ်နည်းနဲ့အညီ ဆက်လက် ဆောင်ရွက်သွားမယ်လို့ ဆိုပါတယ်။
