သျှမ်းပြည်နယ်မြောက်ပိုင်း သိန္နီမြို့နယ်အတွင်း ယခုလအစောပိုင်းခန့်ကစတင်ပြီး ကားလမ်းမကြီး၌ လမ်းပိတ်ပြီး KIA အဖွဲ့က ဆက်ကြေးကောက်ခံနေကြကြောင်း ဒေသသတင်းအရင်းအမြစ်များကဆိုသည်။ သိန္နီမြို့နယ် ကွန်ကောက်ကျေးရွာအုပ်စုအတွင်း ကုန်တင်ကားကြီးများအား ရပ်တန့်စေပြီး ငွေကြေးအဆမတန်တောင်းခံလျက်ရှိသည်ဟုသိရသည်။
“အခုက ပြောင်းဖူးပေါ်တဲ့အချိန်ဆိုတော့ တရုတ်ပြည်ဘက်ကို ပြောင်းဖူးပို့ကြတဲ့ကုန်တင်ကားကြီးတွေဆိုရင် တစ်စီးကို ၁၀ သိန်းကျပ်ကနေ သိန်း (၇၀) သိန်း (၈၀) ကျပ်အထိ တောင်းကြတယ်။ မပေးနိုင်ဘူးဆိုရင် ကားသော့တွေဖြုတ်သိမ်းသွားတာတွေလုပ်ပြီး ဆက်သွားလို့မရအောင်လုပ်ကြတယ်။ ပြောင်းအခွန်ဆိုပြီး ဝယ်တဲ့နေရာမှာလည်း အဖွဲ့ပေါင်းစုံက ကောက်ကြသလို သွားပို့တဲ့အချိန်မှာလည်း ထပ်ကောက်နေကြတော့ အဆင်မပြေတော့ဘူး။ ပြီးတော့ သူတို့က သျှမ်းရွာတွေထဲမှာ လာလာကောက်တော့ ခဏနေရင် တိုက်ပွဲလာဖြစ်မှာလည်း ဒေသခံတွေက စိုးရိမ်ကြတာပေါ့။” သိန္နီဒေသခံတစ်ဦးက ပြောပြသည်။
အောက်တိုဘာလ (၁၅) ရက်နေ့ကလည်း သိန္နီမြို့နယ် ၊ စယ်အူကျေးရွာအုပ်စု ဟိုမိန်းကျေးရွာနှင့် နားခေးကျေးရွာကြားရှိ လမ်းမကြီးတွင် KIA အဖွဲ့မှ ကုန်တင်ကားသုံးစီးအား ဆက်ကြေးမပေးသောကြောင့်ဟုဆိုကာ ကားသော့သိမ်းသွားခဲ့သည်ဟုဆိုသည်။
သျှမ်းပြည်နယ်မြောက်ပိုင်း လားရှိုးမြို့တွင် လက်နက်ကိုင်အဖွဲ့များစွာက စီးပွားရေးလုပ်ငန်းရှင်များနှင့် ဟိုတယ်လုပ်ငန်းရှင်များအား ငွေကြေးအဆမတန် တောင်းခံမှုများ မကြာခဏပြုလုပ်ကြသည်။ ၎င်းတို့ တောင်းသောငွေကြေးများ မပေးဆောင်ပါက ဗုံးခွဲခြိမ်းခြောက်မှုများလည်း ပြုလုပ်ကြသောကြောင်း လစဉ်လတိုင်း လားရှိုးမြို့၌ ဗုံးကွဲမှုဖြစ်ပွားလျက်ရှိကြောင်း သတင်းရရှိသည်။