သျှမ်းပြည်နယ်မြောက်ပိုင်း လားရှိုး-နမ္မတူကို သွားလာရန် နောက်ဆုံးကျန်ရှိနေသော နားကွမ်တံတားလည်း ယမန်နေ့ (၁၁.၁.၂၀၂၄)ရက်နေ့ ညပိုင်းခန့်တွင် မိုင်းခွဲဖျက်ဆီးခံလိုက်ရပြီဖြစ်ကြောင်း သတင်းရရှိသည်။
လားရှိုး-နမ္မတူ အဓိကလမ်းမကြီးပေါ်ရှိ အီနိုင်းတံတား ဖျက်ဆီးခံရမှုကြောင့် မူဆယ်၊နမ့်ခမ်း၊ ကွတ်ခိုင်၊နမ့်တူ၊ လားရှိုး သွားလာရန် နားကွမ်တံတားကို အသုံးပြုဖြတ်သန်းနေခြင်းဖြစ်ပြီး ယခုအခါ ဖျက်ဆီးခံလိုက်ရပြီဖြစ်သည်။
ယမန်နေ့က မြောက်ပိုင်းမဟာမိတ်အဖွဲ့နှင့် စစ်ကောင်စီတပ်တို့သည် တရုတ်နိုင်ငံကူမင်းမြို့၌ တတိယအကြိမ်တွေ့ဆုံဆွေးနွေးခဲ့ပြီး ယာယီအပစ်အခတ်ရပ်စဲရေး သဘောတူခဲ့သည်ဟု သတင်းထွက်ပေါ်ခဲ့သော်လည်း ယမန်နေ့ညတွင်ပင် သျှမ်းပြည်နယ်မြောက်ပိုင်း လားရှိုးမြို့၌ လက်နက်ကြီးသံများ ပိုမိုကျယ်လောင်စွာ ထွက်ပေါ်ခဲ့ကြောင်း သိရသည်။
