ယမန်နေ့ စက်တင်ဘာလ(၂)ရက် လာအိုနိုင်ငံမှ မြန်မာရွှေ့ပြောင်း အလုပ်သမား ၄၀ တင်ဆောင်လာသည့် စက်လှေတစ်စီးသည် မဲခေါင်မြစ်အတွင်း ရွှေတြိဂံအနီးမှာ မတော်တဆ စက်လှေ တိမ်းမှောက်မှုဖြစ်ပွားပြီး လူ ၁၀ ဦးကို ကယ်ဆယ်နိုင်ခဲ့ပြီး ၃ဝ ဦး ပျောက်ဆုံးနေဆဲဖြစ်ကြောင်း ထိုင်းသတင်းမီဒီယာ၏ သတင်းဖော်ပြချက်အရသိသည်။
စက်လှေသည် လာအိုနိုင်ငံ၊ ဝေါ်ကျောက်ခရိုင်၊ Tung Phai မြို့နယ်၊ ရွှေတြိဂံစီးပွားရေးဇုန်မှ မြန်မာနိုင်ငံ၊ တာချီလိတ်မြို့ရှိ နမ့်ဟုတ်သင်္ဘောဆိပ်သို့ ဦးတည်ထွက်ခွာလာတာလို့ ထိုင်းနိုင်ငံ MRROnline သတင်းဌာနက ဖော်ပြထားပါသည်။
အဆိုပါ စက်လှေသည် မဲခေါင်မြစ်အလယ်သို့ ရောက်ရှိချိန်မှာ အင်ဂျင်စက် ရုတ်တရက် ရပ်သွားပြီး စက်လှေမောင်းသူမှာ လှေကို အလိုရှိရာသို့ မထိန်းချုပ်နိုင်သည့်အပြင် မဲခေါင်မြစ်အတွင်း လျင်မြန်စွာ စီးဆင်းနေတဲ့ ရေပမာဏ များပြားမှုကြောင့် လှေတိမ်းမှောက်မှု ဖြစ်ပွားရခြင်းဖြစ်ကြောင်း သိရသည်။
အခင်းဖြစ်ပွားသည့် စက်လှေမှာ ပုံမှန် ထိုင်း-လာအို-မြန်မာ နယ်စပ်ဖြတ်ကျော် လှေမဟုတ်ဘဲ လာအိုနိုင်ငံမှ မြန်မာနိုင်ငံသား ၄၀ ခန့် တင်ဆောင်လာသည့် စင်းလုံးငှား လှေတစ်စင်းဖြစ်ကြောင်း ကနဦး သိရပါသည်။
လက်ရှိတွင် လာအိုအာဏာပိုင်များက တရားမဝင် အလုပ်သမားများကို နှိမ်နင်းနေပြီး အလုပ်သမား ပါမစ်မရှိသူများက စက်လှေဖြင့် ထွက်ပြေးတိမ်းရှောင်ကြကြောင်း သိရှိရပါသည်။
