ဒုစရိုက်မှု မကြာခဏဖြစ်ပွားလျက်ရှိသည့် မူဆယ်မြို့တွင် ယမန်နေ့ ဧပြီလ(၂၇)ရက် ည ၁၀ နာရီ ၄၈ မိနစ်ခန့်တွင် မူဆယ်မြို့ စွမ်စော်ရပ်ကွက်(၁)ရှိ ရွှေသမင် ငါးပစ်ဂိမ်းဆိုင်ကို လူတစ်စုက ဗုံးဖြင့် လာပစ်သွားခဲ့ကြောင်း သိရသည်။
အဆိုပါ ဗုံးပေါက်ကွဲမှုကြောင့် ဆိုင်အတွင်းရှိ အမျိုးသား(၁)ဦး၊ အမျိုးသမီး(၃)ဦး ထိခိုက်ဒဏ်ရာရရှိခဲ့သည်။
“လက်နက်ကိုင်တွေနဲ့ မသမာသူတွေက ငွေပေးဖို့ တောင်းတာကို မပေးတဲ့အတွက် ဗုံးနဲ့ဆိုင်ထဲကို လာပစ်သွားတာပေါ့။ ဆိုင်ထဲမှာရှိတဲ့ ဝန်ထမ်း ကျား(၁)ယောက်၊ မ(၃)ယောက် ဒဏ်ရာရတယ်။ မူဆယ်မှာက လက်နက်နဲ့လုယက်မှုတွေ၊ ဓားပြမှုတွေအပြင် အခုလို ခြိမ်းခြောက်ပြီး ငွေတောင်းတာတွေက နေ့တိုင်းလိုလိုဖြစ်နေပြီ။”ဟု မူဆယ်ဒေသခံ သျှမ်းတိုင်းရင်းသားတစ်ဦးက ပြောပြသည်။
သျှမ်းပြည်နယ်မြောက်ပိုင်း၏ နယ်စပ်မြို့ဖြစ်သော မူဆယ်မြို့၌ တိုင်းရင်းသားလက်နက်ကိုင်အဖွဲ့များစွာရှိသလို ဌာနေပြည်သူ့စစ်များလည်းရှိသည်။ မြို့အတွင်း လောင်းကစားဂိမ်းများကို ပြည်သူ့စစ် လုံခြုံရေးဖြင့် ဖွင့်လှစ်ကစားနေသည်မှာ တရားဝင်အတိုင်းဖြစ်နေသည်ဟု ဒေသခံများကဆိုသည်။